Kuanjai Magazine
ຖ້າເວົ້າເຖິງວົງການບັນເທິງລາວ ຄົງຈະບໍ່ມີໃຜຈະບໍ່ຮູ້ຈັກຜູ້ຍິງຄົນນີ້ “ຢຸ້ຍ ສັນທະນີ” Miss Supranational Laos 2018 ເພາະວ່ານາງເປັນນາງງາມ ແລະ ນາງແບບ ທີ່ໜ້າຈັບຕາເບິ່ງອີກຄົນໜຶ່ງເລີຍກໍວ່າໄດ້. ແລະຫຼ້າສຸດ ສາວ ຢຸ້ຍ ກໍໄດ້ກຽມຈະຈັດງານ Fashion show “Pakse Fashion Week” ຂຶ້ນເປັນຄັ້ງທໍາອິດ ຢູ່ທີ່ ນະຄອນປາກເຊ ແຂວງ ຈໍາປາສັກ ໃນວັນທີ 4 ເມສາ 2020. ເຊິ່ງງານແຟຊັນໂຊຄັ້ງນີ້ ແມ່ນເປັນງານເດີນແບບເພື່ອການກຸສົນ ໂດຍການລວມເອົາບັນດາ ນາງແບບ, ນາຍແບບ, ສິນລະປິນ-ນັກຮ້ອງ ແລະ ເນັດໄອດອລຄົນດັງຂອງລາວມາຮ່ວມ ເພື່ອລະດົມທຶນໄປຊ່ວຍເຫລືອຜູ້ທີ່ຮັບຜົນກະທົບຈາກ ໄພນໍ້າຖ້ວມ.
ຫຼັງຈາກທີ່ຫ່າງຫາຍໄປຈາກວົງການໄລຍະໜຶ່ງ ເພື່ອຫັນໜ້າເຂົ້າສູ່ການປະຕິບັດທໍາບວດຂາວ ຢູ່ທີ່ວັດແຫ່ງໜຶ່ງຂອງປະເທດໄທ . ນີ້ຖືໄດ້ວ່າ ເປັນການຫວນຄືນເຂົ້າສູ່ວົງການບັນເທິງອີກຄັ້ງຂອງ “ຢຸ້ຍ” ພ້ອມປັບລຸກໂສມໃໝ່ທີ່ໝັ້ນໃຈກວ່າເກົ່າ ພ້ອມທັງຜັນຕົວເອງມາເຮັດໂຄງການເພື່ອຊ່ວຍເຫຼືອສັງຄົມ
“ຢຸ້ຍ” ໄດ້ກ່າວໃນວີດີໂອວ່າ ການເຮັດວຽກຊ່ວຍເຫຼືອສັງຄົມໃນການຈັດງານຄັ້ງນີ້ ເພື່ອລະດົມທຶນໄປຊ່ວຍເຫຼືອໂຮງຮຽນໃນເຂດ 4 ແຂວງພາກໃຕ້ທີ່ໄດ້ຮັບຜົນກະທົບຈາກໄພນໍ້າຖ້ວມຜ່ານມາ ເຖິງແມ່ນວ່າ ເຫດການດັ່ງກ່າວຈະຜ່ານໄປແລ້ວ ແຕ່ຮ່ອງຮອຍຄວາມເສຍຫາຍຕ່າງໆຍັງບໍ່ທັນໄດ້ຮັບການປັບປຸງຢ່າງທົ່ວເຖິງເທື່ອ
ພ້ອມນັ້ນ ເພື່ອເປັນການສົ່ງເສີມແຫຼ່ງທ່ອງທ່ຽວ, ວິຖີຊີວິດ, ຮີດຄອງປະເພນີຂອງຄົນລາວ ໂດຍສະເພາະແມ່ນຢູ່ເຂດແຂວງພາກໃຕ້ຂອງເຮົາ ເພື່ອສືບສານວັດທະນະທໍາ ການນຸ່ງຖືທີ່ເປັນເອກະລັກຂອງຄົນລາວ ແລະ ສຸດທ້າຍແມ່ນຢາກປຸກລະດົມນໍ້າໃຈຂອງຄົນລາວໃຫ້ຫັນມາຊ່ວຍກັນ.
https://www.facebook.com/Paksefashionweek/videos/590396468171728/?t=2
