“ມະຍຸລີ ຊູຕັນນຸວົງ” ອອກມາສະແດງຄໍາຂອບໃຈ ຫຼັງໄດ້ຮັບແຕ່ງຕັ້ງເປັນ Miss Teen Laos 2020…

ເນື່ອງຈາກ ການລະບາດພະຍາດໂຄວິດ-19 ເຮັດໃຫ້ຫຼາຍໆຢ່າງມີການປ່ຽນແປງໄປ ບໍ່ສາມາດດໍາເນີນການໄດ້ເປັນປົກກະຕິ ລວມໄປເຖິງວົງການ ນາງງາມ ເອງກໍໄດ້ຮັບຜົນກະທົບ ຫຼາຍໆເວທີທັງລະດັບສາກົນ ແລະ ພາກພື້ນຕ້ອງຍຸຕິການປະກວດລົງ ແລ້ວລົງນາມກັນແຕ່ງຕັ້ງສາວງາມຂຶ້ນມາຮັບຕໍາແໜ່ງ ບາງເວທີກໍໃຫ້ຜູ້ເກົ່າຮັບຕໍາແໜ່ງໄປແບບ 2 ປີຊ້ອນກັນເລີຍ… ຫຼ້າສຸດ ເວທີນາງງາມລາວທີ່ຫາກໍຈັດຂຶ້ນເປັນປີທໍາອິດໃນປີກາຍຄື ເວທີ Miss Teen Laos ມີສທີນລາວ ກໍໄດ້ອອກມາແຈ້ງຢ່າງເປັນທາງການແລ້ວວ່າ ບໍ່ສາມາດຈັດການປະກວດໃນປີ 2020 ນີ້ໄດ້.  ດັ່ງນັ້ນ,  ເມື່ອວັນທີ8 ມິຖຸນາ ບໍລິສັດ ກ້າວໜ້າລາວ ເອັນເຕີເທັນເມັນ ຈໍາກັດ ໃນນາມເຈົ້າຂອງລິຂະສິດ ແລະ ເປັນຜູ້ຈັດການປະກວດ Miss Teen Laos ໄດ້ແຕ່ງຕັ້ງ ຮອງອັນດັບ 1 Miss Teen Laos 2019 ນາງ ມະຍຸລີ ຊູຕັນນຸວົງ ຂຶ້ນຮັບຕຳແໜ່ງ ແລະ ປະຕິບັດໜ້າທີ່ເປັນ Miss Teen Laos 2020 ຢ່າງເປັນທາງການ ຕາມກົດລະບຽບຂອງກອງປະກວດ.

ຫຼ້າສຸດ  ມະຍຸລີ ຊູຕັນນຸວົງ   ຫລືສາວແອ່ນຈີ້  ກໍໄດ້ອອກມາໂພສຜ່ານເພສບຸກສ່ວນຕົວວ່າ: “ເຫມືອນຄວາມຝັນໄດ້ກັບຄືນມາໃຫມ່ ແລະ ກາຍເປັນຈິງ ແອ່ນຈີ້ ຂໍຂອບໃຈໂອກາດທີ່ດີທີ່ສຸດໃນການໄດ້ຮັບຕຳແຫນ່ງ Miss Teen Laos 2020 ຫລັງຈາກທີ່ໄດ້ດຳລົງຕຳແຫນ່ງເປັນຮອງອັນດັບຫນຶ່ງປີ 2019 ຄົບ 1ປີເຕັມ ກໍ່ຖືວ່າພູມໃຈທີ່ສຸດແລ້ວແຕ່ພໍໄດ້ຮັບໂອກາດທີ່ຍິ່ງໃຫຍ່ໃນຄັ້ງນີ້ ແອ່ນຈີ້ ພູມໃຈທີ່ສຸດ ພ້ອມຈະເຮັດຫນ້າທີ່ໃຫ້ດີທີ່ສຸດ ແລະ ເປັນແບບຢ່າງທີ່ດີຂອງໄວຫນຸ່ມລາວທົ່ວປະເທດ ຈະປະຕິບັດທຸກຫນ້າທີ່ຢ່າງຫ້າວຫັນ ໃນ 1ປີ ຕໍ່ຈາກນີ້ໃຫ້ດີທີ່ສຸດ ແລະ ພ້ອມຈະພັດທະນາຕົນເອງທຸກໆມື້ ຂໍຂອບໃຈທຸກກຳລັງໃຈທີ່ມອບໃຫ້ ແອ່ນຈີ້ ຕະຫລອດມາ, ຂອບໃຈຄອບຄົວທີ່ຄອຍຢູ່ຄຽງຂ້າງທຸກເວລາ, ທີ່ສຳຄັນຂອບໃຈ ກອງປະກວດ Miss Teen Laos ແລະ ບໍລິສັດ ກ້າວຫນ້າລາວ ເອັນເຕີເທັນເມັນ ຈຳກັດ.