ເປັນປະເດັນໂຕ້ຖຽງກັນມາໄດ້ໄລຍະໜຶ່ງແລ້ວກ່ຽວກັບບໍລິສັດຍັກໃຫຍ່ຂອງປະເທດລາວຄື ລັດວິສາຫະກິດ ໄຟຟ້າລາວ ທີ່ໃນໄລຍະການລະບາດຂອງໂຄວິດ-19 ທາງໄຟຟ້າລາວກໍໄດ້ອອກມາແຈ້ງການຫຼຸດຄ່ານໍາໃຊ້ໄຟຟ້າໃຫ້ປະຊາຊົນເພື່ອເປັນການຊ່ວຍເຫຼືອຄົນລາວໃນຊ່ວງວິກິດ… ແຕ່ຜົນປາກົດວ່າ ປະຊາຊົນສ່ວນຫຼາຍອອກມາຮຽກຮ້ອງ ແລະ ໂຈມຕີຄ່າໄຟຟ້າບໍ່ໄດ້ຫຼຸດລົງແຖມເພີ່ມຂຶ້ນອີກຕ່າງຫາກ!!! ຈົນເຮັດໃຫ້ເປັນກະແສວິພາກວິຈານ ພ້ອມທັງຮຽກຮ້ອງໃຫ້ລັດຖະບານອອກມາແກ້ໄຂໃນຈຸດນີ້… ເມື່ອບໍ່ດົນມາ ທາງພະນະທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ.ລາວ ກໍໄດ້ອອກມາແຈ້ງວ່າຈະຊ່ວຍເລັ່ງແກ້ໄຂກ່ຽວກັບບັນຫາດັ່ງກ່າວໃຫ້ໄວທີ່ສຸດ.
ຈົນມາຮອດວັນທີ 8 ມີຖຸນາ ຜ່ານມານີ້ ກະຊວງການເງິນໄດ້ອອກຂໍ້ຕົກລົງ ເລກທີ 1439/ກງ ລົງວັນທີ 8 ມີຖຸນາ 2020 ວ່າດ້ວຍການແຕ່ງຕັ້ງຜູ້ວ່າການອຳນວຍການ ລັດວິສາຫະກິດ ໄຟຟ້າລາວ ໂດຍມີຂໍ້ຕົກລົງດັ່ງນີ້:
1. ແຕ່ງຕັ້ງທ່ານຈັນທະບູນ ສຸກອາລຸນ ຫົວໜ້າກົມແຜນການ ແລະການຮ່ວມມື ກະຊວງພະລັງງານ ແລະບໍ່ແຮ່ ເປັນຜູ້ວ່າການອຳນວຍການ ລັດວິສາຫະກິດ ໄຟຟ້າລາວ.
2. ທ່ານທີ່ຖືກແຕ່ງຕັ້ງຕ້ອງປະຕິບັດພາລະ, ບົດບາດ, ໜ້າທີ່, ຂອບເຂດສິດ ແລະຄວາມຮັບຜິດຊອບຢ່າງຖືກຕ້ອງກັບກົດໝາຍ ແລະລະບຽບການທີ່ກ່ຽວຂ້ອງຂອງ ສປປ ລາວ ວາງອອກ, ພ້ອມນັ້ນໃຫ້ສະຫຼຸບຜົນການເຄື່ອນໄຫວຈັດຕັ້ງປະຕິບັດວຽງງານ ແລ້ວລາຍງານຄະນະນຳກະຊວງພະລັງງານ ແລະບໍ່ແຮ່ປົກກະຕິຕາມລະບຽບການ.
3. ຫ້ອງການກະຊວງການເງິນ, ກົມຈັດຕັ້ງ ແລະພະນັກງານ ກົມຄຸ້ມຄອງວິສາຫະກິດລັດລົງທຶນ ແລະການປະກັນໄພ, ກະຊວງພະລັງງານ ແລະບໍ່ແຮ່, ລັດວິສາຫະກິດໄຟຟ້າລາວ ທ່ານທີ່ຖືກແຕ່ງຕັ້ງ ທຸກພາກສ່ວນທີ່ກ່ຽວຂ້ອງຈົ່ງຮັບຮູ້ ແລະຈັດຕັ້ງປະຕິບັດຂໍ້ຕົກລົງສະບັບນີ້ຢ່າງເຂັ້ມງວດ.
4. ຂໍ້ຕົກລົງສະບັບນີ່ມີຜົນສັກສິດຕັ້ງແຕ່ລົງລາຍເຊັນ ໂດຍ ທ່ານລັດຖະມົນຕີກະຊວງການເງິນ ສົມດີ ດວງດີ
ສ່ວນວ່າສາເຫດທີ່ເຮັດໃຫ້ຕ້ອງມີການແຕ່ງຕັ້ງ ຜູ້ອໍານວຍການຄົນໃໝ່ ແມ່ນຍັງບໍ່ໄດ້ມີການເປີດເຜີຍ… ແຕ່ຫວັງຢ່າງຍິ່ງວ່າການຕັດສິນໃຈປ່ຽນແປງຂອງທາງລັດຖະບານຄັ້ງນີ້ ຈະສາມາດຊ່ວຍເຫຼືອປະຊາຊົນກ່ຽວກັບຄ່າຊົມໃຊ້ໄຟຟ້າໄດ້…
ທີ່ມາ: ໂທລະໂຄ່ງ THOLAKHONG