Kuanjai Magazine
ທັກທາຍສະບາຍດີຕອນເຊົ້າວັນອັງຄານ! ເລີ່ມຕົ້ນເຊົ້າມື້ນີ້ ສໍາຫຼັບໃຜທີ່ກຳລັງທໍ້ ຫຼືພົບບັນຫາຊີວິດໃນຕອນນີ້ ຂວັນໃຈມີເລື່ອງເລົ່າຂອງເດັກນ້ອຍຍິງຄົນໜື່ງ ມາເປັນແຮງບັນດານໃຈໃນການສູ້ຊີວິດໃຫ້ກັບທຸກຄົນ … ເລື່ອງທີ່ຂວັນໃຈຈະເລົ່າໃນມື້ນີ້ແມ່ນ ເປັນເລື່ອງລາວຂອງສາວນ້ອຍຄົນໜື່ງທີ່ຢູ່ປະເທດເພື່ອນບ້ານເຮົານີ້ເອງ ເຊິ່ງສາວນ້ອຍຄົນນີ້ຊື່ວ່າ ນ້ອງໃໝ່ ປັດຈຸບັນກຳລັງຮຽນຢູ່ຊັ້ນ ມ 4 ເຊິ່ງລາວໄດ້ເກີດຂຶ້ນມາຢູ່ໃນຄອບຄົວທີ່ມີຖານະ ຫຼື ຕົ້ນທຶນຊີວິດທີ່ຄ້ອນຂ້າງຕໍ່າ ທາງຄອບຄົວຍຶດຖືອາຊີບເກັບຂີ້ເຫຍື້ອຫຼາຍກວ່າ 10 ປີແລ້ວ ໂດຍນ້ອງໄດ້ເລົ່າວ່າ ແຕ່ລະມື້ຫຼັງເລິກຮຽນແຕ່ລະມື້ ແລະ ວັນພັກເສົາ-ອາທິດ ລາວຈະໄປຊ່ວຍແມ່ເຮັດວຽກ ນັ້ນກໍຄື ເອົາລົດເຂັນໄປເລາະເກັບເສດກະຕຸກ ຕາມຖັງຂີ້ເຫຍື້ອໃນໝູ່ບ້ານ-ຕະຫຼາດສົດ ແລະ ບ່ອນຖິ້ມຂີ້ເຫຍື້ອຂອງເທດສະບານ ສ່ວນລາຍໄດ້ນັ້ນ ບາງມື້ກໍໄດ້ 100-200 ບາດ (30-60 ພັນກີບ) ຫາກມື້ໃດໄດ້ຫຼາຍກວ່ານັ້ນກໍຈະເກັບໄວ້ຊື້ອຸປະກອນການຮຽນອື່ນໆ ລາວຍັງເວົ້າອີກວ່າ ການເຮັດອາຊີບນີ້ເພື່ອຊ່ວຍຄອບຄົວລວມໄປເຖິງສົ່ງຕົນເອງຮຽນນັ້ນບໍ່ເຄີຍອາຍ ແລະ ບໍ່ສົນໃຈວ່າໝູ່ຈະເຍາະເຢີ້ຍ ເພາະເປັນອາຊີບທີ່ບໍລິສຸດ
ນອກຈາກນີ້ດ້ານແມ່ຂອງນ້ອງກໍຍັງໄດ້ບອກວ່າຕົນມີລູກ 2 ຄົນ ລູກຜູ້ທໍາອິດ ມີຄອບຄົວແລ້ວ ແລະ ແຍກກັນຢູ່ກັບພັນລະຍາ ສ່ວນລູກສາວຫຼ້າກໍຄືນ້ອງໃໝ່ ທີ່ກຳລັງຮຽນຢູ່ຊັ້ນ ມ 4 ອີ່ຕົນລູກສາວ ບາງມື້ເວລາໄປໂຮງຮຽນກໍຖືກໝູ່ເພື່ອນເວົ້າໃສ່,ເຍາະເຢີ້ຍວ່າເປື້ອນ ຕົນກໍໄດ້ແຕ່ບອກກັບລູກວ່າ ການເກັບຂີ້ເຫຍື້ອມັນເປັນອາຊີບຂອງແມ່ ມີກິນມີໃຊ້ກໍເພາະຂີ້ເຫຍື້ອ ບໍ່ຕ້ອງຮູ້ສຶກນ້ອຍໃຈເດີ້ ແຕ່ໂຊກດີທາງໂຮງຮຽນຊ່ວຍເຫຼືອເປັນຢ່າງດີ ເພາະນ້ອງໃໝ່ເປັນຄົນດຸໝັ່ນ ຕັ້ງໃຈຮຽນ ເກດສະເລ່ຍສູງເຖິງ 3.60…
ແອດເຊື່ອວ່ານີ້ອາດຈະເປັນອີກໜື່ງຕົວຢ່າງທີ່ດີສໍາຫຼັບຫຼາຍໆຄົນຢູ່ໃນສັງຄົມ ແລະ ບໍ່ວ່າເຈົ້າຈະເກີດມາຢູ່ໃນຖານະໃດ ຄໍາວ່າຄົນ ລ້ວນແຕ່ມີຄຸນຄ່າເທົ່າທຽມກັນ ຢ່າອາຍທີ່ຈະທໍາມາຫາກິນ ຖ້າເຮົາມີຕົ້ນທຶນຊີວິດທີ່ໜ້ອຍກໍຄວນພະຍາຍາມອົດທົນຫຼາຍກວ່າຄົນທີ່ມີຕົນທຶນຊີວິດທີ່ສູງ ຖ້າເຮົາດຸໝັ້ນ, ອົດທົນ, ພະຍາຍາມ ເຮົາບໍ່ມີຄໍາວ່າອົດຢາກ ແລະ ມື້ໜື່ງອາດຈະເປັນມື້ຂອງເຮົາ! ເພາະຄົນເຮົາເລືອກເກີດບໍ່ໄດ້ແຕ່ເລືອກທີ່ຈະເປັນໄດ້…
ຂອບໃຈແຫຼ່ງຂໍ້ມູນ: https://www.soupsipupdate.com/
