Kuanjai Magazine
7 ວິທີ! ປ່ຽນຕົວເອງເພື່ອຊີວິດທີ່ມີຄວາມສຸກຫຼາຍຍິ່ງຂຶ້ນ ງ່າຍໆ!!!
ບາງຄັ້ງການທີ່ເຮົາໃຊ້ຊີວິດໃນແຕ່ລະມື້ທີ່ແສນຈະວຸ້ນວາຍ ອາດເຮັດໃຫ້ເຮົາລືມຄວາມສຸກທີ່ເກີດຂຶ້ນໃນແຕ່ລະມື້ໄປ ດ້ວຍຄວາມທີ່ເຮົາເບິ່ງແຕ່ອານາຄົດຢ່າງດຽວວ່າ ຖ້າເຮົາໄດ້ອັນນີ້ມາຄອບຄອງແລ້ວເຮົາຈະມີຄວາມສຸກ ເຮົາຈຶ່ງພະຍາຍາມໄຂວ່ຄວ້າສິ່ງທີ່ເຮົາຕ້ອງການມາໃຫ້ໄດ້ ທັ້ງທີ່ບາງເທື່ອຄວາມສຸກກໍຢູ່ໃກ້ໆຕົວເຮົານີ້ແຫຼະ ຖ້າເຮົາຮູ້ຈັກປັບຄວາມຄິດ ແລະຢູ່ກັບຄວາມສຸກທີ່ເກີດຂຶ້ນໃນແຕ່ລະມື້ ມື້ນີ້ Kuanjai ຈຶ່ງຢາກຈະມາບອກ 7 ວິທີ! ປ່ຽນຊີວິດໃຫ້ມີຄວາມສຸກຫຼາຍຂຶ້ນມາຕ້ອນສາວໆກັນ!
- ພໍໃຈໃນຊີວິດ
ຄວາມເພິ່ງພໍໃຈໃນຊີວິດທີ່ເປັນຢູ່ນີ້ແຫຼະຄືສຸດຍອດຂອງຄວາມສຸກ ຖ້າຫາກເຈົ້າໄດ້ເຮັດສິ່ງທີ່ເຈົ້າເປັນ ສິ່ງທີ່ເຮົາມີຢູ່ ທຸກຢ່າງທີ່ເກີດຂຶ້ນໃນຊີວິດລ້ວນແຕ່ເປັນເລື່ອງທີ່ດີ ເຈົ້າລອງໃຊ້ຊີວິດໃຫ້ຊ້າລົງແລ້ວສັງເກດຊີວິດເຈົ້າໃຫ້ດີໆ ເພື່ອວ່າຈະມີເລື່ອງດີໆເກີດຂຶ້ນຢ່າງຫຼວງຫຼາຍ ເຝິກເພິ່ງພໍໃຈກັບເລື່ອງນ້ອຍໆໃນຊີວິດ ເຈົ້າກໍຈະມີຄວາມສຸກຂຶ້ນຫຼາຍເລີຍແຫຼະ
- ຢຸດປຽບທຽບຊີວິດຕົວເອງກັບຄົນອື່ນ
ໃນຊີວິດຂອງແຕ່ລະຄົນຍ່ອມມີທັງເລື່ອງດີ ແລະເລື່ອງໍ່ດີປະປົນກັນໄປ ການທີ່ເຮົາເຫັນດ້ານທີ່ຄົນອື່ນປະສົບຄວາມສໍາເລັດແລ້ວເອົາມາປຽບທຽບກັບຊີວິດຕົນເອງ ຈະເປັນການບັ່ນທອນຄວາມຮູ້ສຶກ ແລະກໍາລັງໃຈຂອງຕົວເອງລ້າໆ ເສັ້ນທາງຊີວິດຂອງແຕ່ລະຄົນບໍ່ຄືກັນ ດັ່ງນັ້ນ ຈົ່ງຢຸດປຽບທຽບຊີວິດຂອງຕົນເອງກັບຄົນອື່ນ ແລ້ວເຈົ້າຈະມີຄວາມສຸກຫຼາຍຂຶ້ນ
- ວາງມືຈາກໂລກໂຊຊ່ຽວແດ່
ການເສບສື່ໂຊຊ່ຽວຫຼາຍໆ ເຮັດໃຫ້ເຮົາໄດ້ຮັບຂໍ້ມູນຂ່າວສານເກີນຄວາມຈໍາເປັນ ແລະເຮັດໃຫ້ຮູ້ສຶກເມື່ອຍ ທັງຍັງເສຍເວລາຫຼາຍກັບໂລກໂຊຊ່ຽວ ຈົນລືມໂອ້ລົມກັບຄົນທີ່ຢູ່ອ້ອມຂ້າງ ລອງວາງມືຈາກໂລກໂຊຊ່ຽວແດ່ ເຈົ້າຈະພົບວ່າເຈົ້າມີເວລາເພີ່ມຂຶ້ນ ແລະມີສະມາທິໃນການເຮັດສິ່ງອື່ນໆໄດ້ດີຂຶ້ນຢ່າງໜ້າອັດສະຈັນ
- ລອງຍ່າງແທນການຂີ່ລົດ
ການເດີນທາງໃນໄລຍະທີ່ບໍ່ໄກຫຼາຍເຊັ່ນ: ຍ່າງໄປຊື້ເຄື່ອງ, ຍ່າງໄປກິນເຂົ້າສວາຍ ການຍ່າງຈະເຮັດໃຫ້ເຮົາໄດ້ໃຊ້ຊີວິດຊ້າລົງ ສັງເກດບັນຍາກາດອ້ອມຂ້າງຫຼາຍຂຶ້ນ ເຫັນວິຖີຄວາມເປັນໄປໄດ້ຂອງຄົນອ້ອມຂ້າງຫຼາຍຂຶ້ນ ໄດ້ເປີດມຸມມອງໃໝ່ໆ ແລະຫຼຸດການໂຟກັສແຕ່ເລື່ອງຂອງຕົວເອງລົງ
- ຊ່ວຍເຫຼືອຜູ້ທີ່ກໍາລັງພົບບັນຫາ
ການຊ່ວຍເຫຼືອຜູ້ທີ່ກໍາລັງປະສົບບັນຫາ ບໍ່ຈໍາເປັນຕ້ອງເປັນເລື່ອງທີ່ໃຫຍ່ເຊັ່ນ: ເປັນທີ່ປຶກສາໃຫ້ກັບໝູ່ທີ່ກໍາລັງທຸກໃຈ ໃຫ້ອາຫານໝາບໍ່ມີເຈົ້າຂອງ ຊ່ວຍເຫຼືອຜູ້ອື່ນໃຫ້ຮູ້ສຶກສະບາຍໃຈ ແລະມີຄວາມສຸກ ຄວາມສຸກນັ້ນຈະສົ່ງມາເຖິງເຮົາແບບບໍ່ໜ້າເຊື່ອ
- ລອງຂຽນເລື່ອງລາວດີໆທີ່ພົບໃນແຕ່ລະມື້
ລອງປະມວນຄວາມສຸກນ້ອຍໆທີ່ເກີດຂຶ້ນໃນແຕ່ລະມື້ ແມ່ນແຕ່ເລື່ອງທີ່ໜັກທີ່ສຸດ ແຕ່ອາຫານທ່ຽງແຊບກໍຖືວ່າເປັນເລື່ອງດີໆທີ່ເກີດຂຶ້ນແລ້ວ ລອງຂຽນບັນທຶກຄວາມສຸກໃນແຕ່ລະມື້ ແລ້ວເຈົ້າຈະປະຫຼາດໃຈວ່າຄວາມສຸກເກີດຂຶ້ນໄດ້ທຸກມື້ ຖ້າເຈົ້າສັງເກີດເລື່ອງນ້ອຍໆ
- ລອງຈິນຕະນາການແບບບໍ່ມີຂອບເຂດ
ລອງຈິນຕະນາການເລື່ອງລາວທີ່ແສນຈະມ່ວນອອນຊອນ ທີ່ເຈົ້າຢາກໃຫ້ເກີດຂຶ້ນແບບບໍ່ມີຂໍ້ຈໍາກັດໃນຊີວິດຂອງເຈົ້າເຊັ່ນ: ຄິດວ່າຕົວເອງໄດ້ໄປທ່ອງທ່ຽວຮອບໂລກຢ່າງທີ່ຢາກໄປ ຄິດວ່າຕົວເອງເສກຫຍັງກໍໄດ້ ຄິດວ່າຕົວເອງເປັນ CEO ບໍລິສັດຍັກໃຫຍ່ ການປົດປ່ອຍຈິນຕະນາການໃຫ້ລ່ອງລອຍໄປເລື້ອຍໆ ກໍສາມາດເຮັດໃຫ້ຈິດໃຈຜ່ອນຄາຍ ແລະມີຄວາມສຸກໄດ້ຢ່າງບໍ່ໜ້າເຊື່ອ!
ເຫັນບໍ່ສາວໆການມີຄວາມສຸກນັ້ນເປັນເລື່ອງທີ່ເຮັດໄດ້ບໍ່ຍາກເລີຍ ຖ້າເຮົາຮູ້ຈັກໃສ່ໃຈເລື່ອງນ້ອຍໆ ແລະຮູ້ຈັກປັບຄວາມຄິດ ແລະມຸມມອງຂອງເຮົາ ພຽງເທົ່ານີ້ກໍມີຄວາມສຸກໃນທຸກມື້ແລ້ວ!!!
