ແຟນໆຂວັນໃຈທີ່ໜ້າຮັກທັງຫຼາຍ ຮູ້ ຫຼື ຍັງຄໍາຂວັນປະຈໍາແຂວງຕົນເອງ ແລະ ຄໍາຂວັນຂອງແຕ່ລະແຂວງປະເທດລາວເຮົາ ຖ້າໃຜຍັງບໍ່ທັນຮູ້ມາອ່ານທາງນີ້ເລີຍ ມື້ນີ້ແອດໄດ້ນໍາເອົາຄວາມຮູ້ດີໆ, ຄວາມຮູ້ຮອບຕົວ ມາຝາກໃຫ້ແຟນຂວັນໃຈໄດ້ຮູ້ຈັກ ຖ້າໃຜຍັງບໍ່ທັນຮູ້ຄໍາຂວັນແຂວງໃດນັ້ນໄປເບິ່ງກັນເລີຍ.
- ນະຄອນຫຼວງວຽງຈັນ: “ ມາວຽງຈັນຊົມຂົວມິດຕະພາບ ກາບໄຫ້ວຫໍພຣະແກ້ວ ຊົມສວນປະຕູໄຊ ໄຫ້ວພຣະທາດຫຼວງມິ່ງຂວັນ ຊົມວິວທິວທັດແຄມຂອງ ຫາດຊາຍສີທອງດອນຈັນ ຊິມລົດອາຫານນາໆຊາດ ເທິງຫໍຜາສາດສີ່ສິບຊັ້ນ ພັກຜ່ອນເທິງວິມານສະຫວັນ ໂຮງແຮມດອນຈັນພາເລສ໌ ລືນາມ ”.
2. ແຂວງ ຜົ້ງສາລີ: “ ຜົ້ງສາລີ ປຽບຄືດັ່ງສະຫວັນສັ່ງ ວິມານດ່ານແດນພູດອຍ ເປັນດິນແດນວິລະຊົນ ຮັກຄອນພົງພັນເຊື້ອ ງາມເຫຼືອຫຼາຍພູຟ້າ ທະເລຫຼວງໝອກໃຫຍ່ ເຊີນຊິມປາພູຟ້າ ດື່ມເຫຼົ້າຂຽວເອ່ວສະຖານທີ່ ເບິ່ງຮີດຄອງປະເພນີ ເອກະລັກຫຼາຍເຜົ່າເຊື້ອ ເປັນຂອງຕ້ອນທ່ານຜູ້ຊົມ ”.
3. ແຂວງ ຫຼວງນໍ້າທາ: “ ບັ້ນຮົບຫຼວງນໍ້າທາ ພຣະທາດໃຫຍ່ຊຽງເປງ ຊາບຊຶ້ງກັບວັດທະນະທໍາຫຼາຍເຜົ່າ ເຂົ້າຊອຍແຊບເມືອງສິງ ລິງລາຍແພໄໝມ້ອນເມືອງຫຼວງນໍ້າທາ ທ່ຽວປ່າສະຫງວນແຫ່ງຊາດນໍ້າຫ້າ ເຂດພັດທະນາເສດຖະກິດພິເສດບໍ່ເຕັນແດນຄໍາ ຮ່ວມເຕັ້ນແຊນໍາສາວໄຕດໍາງາມແທ້ລະກ໋າ ”.
4. ແຂວງ ອຸດົມໄຊ: “ ທ່ຽວອຸດົມໄຊໄປຊົມທໍາມະຊາດ ນໍ້າຕົກຕາດຫົວນໍ້າກັດ ຊົມວັດທະນະທໍາຊົນເຜົ່າ ໄຫ້ວພຣະເຈົ້າສິງຄໍາ ດື່ມນໍ້າຊາພັນປີ ຂີ່ເຮືອທ່ອງທ່ຽວຊົມທໍາມະຊາດແຄມຂອງ ”.
5. ແຂວງ ບໍ່ແກ້ວ: “ ບໍ່ແກ້ວມະນີລໍ້າຄ່າ ຊົມປ່າດອກງິ້ວບານ ເທສະການບັນດາເຜົ່າ ຖິ່ນເມືອງເກົ່າສຸວັນນະໂຄມຄໍາ ຊົມຖໍ້ານໍ້າຍູ້ອູ້ສາວລາວຢວນ ຊວນຊົມວັດຈອມເຂົາມະນີຣັດ ໄຫວ້ພຣະທາດສຸວັນນະຜ້າຄໍາ ”.
6. ແຂວງ ຫຼວງພະບາງ: “ ຫຼວງພະບາງເມືອງງາມ ອາຮາມຮຸ່ງເມືອງນຸ່ງສິ້ນໄໝ ຂວັນໃຈນັກທ່ອງທ່ຽວ ເມືອງກ້ຽວຄໍາຫວານ ຕໍານານເມືອງຂັບທຸ່ມ ງາມພູຕັ້ງກາງເມືອງ ເລືອງລືວັດທະນະທໍາ ເອາະຫຼາມໃສ່ສະຄານ ງານຊ່ວງເຮືອເດືອນເກົ້າ ວັດເກົ່າແກ່ມາກມີ ຕາດກວາງຊີຖໍ້າຕິ່ງ ເປັນມິ່ງເມືອງມໍລະດົກໂລກ ”.
7. ແຂວງ ຊຽງຂວາງ: “ ຊຽງຂວາງ ພູກູດມີໄຊ ທົ່ງໄຫຫີນລືນາມ ສາວງາມເມືອງພວນ ເຊີນຊວນທ່ຽວຊົມແຂວງວິລະຊົນ ”.
8. ແຂວງ ຫົວພັນ: “ ງົດງານມພູຜາ ນໍ້າມ່າສ່ອງໃສ ວຽງໄຊປະຫວັດສາດ ຜ້າໄໝຊໍາໃຕ້ ຫີນຕັ້ງຫົວເມືອງ ຖິ່ນພູສາມເສົ່າ ຄົກເຂົ້ານໍ້າລິນ ແຜ່ນດິນວິລະຊົນ ”.
9. ແຂວງ ໄຊຍະບູລີ: “ ງາມທາດປວກເມືອງຄອບ ປະນົມນ້ອມພຣະທາດມັດຄໍາເມືອງເງິນ ແສນເພີດເພີນພຣະທາດຊຽງລົມເມືອງຊຽງຮ່ອນ ອອນຊອນບຸນບັ້ງໄຟເມືອງປາກລາຍ ງາມເຫຼືອຫຼາຍ ສາວດອກຝ້າຍຈັນເມືອງແກ່ນທ້າວ ຫວານນໍ້າໝາກພ້າວເມືອງບໍ່ແຕນ ແດນພູເຂົາຊ້າງເມືອງຫົງສາ – ເມືອງທົ່ງ ຮວງເຂົ້າກົ່ງເມືອງພຽງ ສຽງຂັບລໍາລ່ອງຮຸ່ງເມືອງໄຊຍະບູລີ ”.
10. ແຂວງ ວຽງຈັນ: “ ເມືອງເກົ່າໄຜ່ໜາມ ລືນາມອ່າງນໍ້າງື່ມ ຕໍານານເດີນລາຍງ້າວ ອູ່ເຂົ້າຊາວເມືອງ ຄົນເຮືອງຂັບງື່ມ ດື່ມດໍາທໍາມະຊາດ ປະຊາຣາຊສາມັກຄີ ”.
11. ແຂວງ ໄຊສົມບູນ: “ ຄົ້ນຫາປະຫວັດສາດເມືອງລ້ອງແຈ້ງ ແຍງຊົມທໍາມະຊາດສັກພູໝອກ ຊອກຫາວິລະກໍາຖໍ້າເຈົ້າອານຸວົງ ລົງລ່ອງເຮືອຊົມທິວທັດທີ່ທ່າໂທມ ກິນເຂົ້າປາສາມັກຄີທີ່ຕາດຜາແຊບລ້ອງຊານ ຊົມຕໍານານນໍ້າຕົກຕາດຜາແຈແລເມືອງຮົ່ມ ”.
12. ແຂວງ ບໍລິຄໍາໄຊ: “ ຖິ່ນອາໄສສາວເມີ້ຍຜູ້ໂສພາ ຖິ່ນຢູ່ໂຕເສົາຫຼາໄມ້ເກດສະໜາຄ່າແພງ ທົ່ງນາແຊງກ້ວາງໄກ ພະບາດໃຫຍ່ໂພນສັນ ຄົນຊ່າລືກ່າວເອີ້ນ ແດນກຸຫຼາບປາກຊັນ ”.
13. ແຂວງ ຄໍາມ່ວນ: “ ຄໍາມ່ວນ ດິນແດນທໍາມະຊາດ ປະຫວັດສາດວິລະຊົນ ຕົ້ນກໍາເນີດລໍາຜະຫຍາມະຫາໄຊ ກິນຊຸບໜໍ່ໄມ້ ແກງໄກ່ໃສ່ສານ ນະມັດສະການພຣະທາດສີໂຄດຕະບອງ ເປັນເຈົ້າຂອງເຂົ້າໜົມປ່ານ ປະສານປວງປະຊາ ເລັ່ງລັດພັດທະນາ ຊ່ວຍປະຊາໃຫ້ມີສຸກ ”.
14. ແຂວງ ສະຫວັນນະເຂດ: “ ສະຫວັນນະເຂດ ຜືນແຜ່ນດິນຄໍາ ພຣະທາດອີງຮັງສະຖານບູຮານງາມສະຫງ່າ ສັດໂລກໄດໂນເສົາຮ້ອຍລ້ານປີ ປະເພນີລໍ້າເລີດກໍາເນີດຂັບລໍາ 4 ຈັງຫວະ ”.
15. ແຂວງ ຈໍາປາສັກ: “ ເອກະລັກວັດພູ ກຸລາບປາກເຊ ກາເຟປາກຊ່ອງ ນໍ້າຂອງໂຕນຄອນ ສີພັນດອນລືນາມ ”.
16. ແຂວງ ສາລະວັນ: “ ໝາກພ້າວນາໄຊ ປີ້ງໄກ່ນາປົ່ງ ເຫຼົ້າຂາວເມືອງຄົງ ລໍາວົງສາລະວັນ ”.
17. ແຂວງ ເຊກອງ: “ ເອກະລັກພູນາງລາວ ແວວວາວຄ່ານ່າຊື່ນໃຈ ທ່ຽວວັງໄງດື່ມເຫຼົ້າໄຫ ເມືອງດາກຈຶງຄະນຶງຫາ ສາຍທາລາຕົກຕາດແຝກ ແປກພະໄທຢ່າລືມໄປຂໍປັນກອກ ບອກຄວາມສາມັກຄີ ໄປຮູ້ຈັກປະເພນີບັນດາເຜົ່າ ”.
18. ແຂວງ ອັດຕະປື: “ ລໍານໍ້າໃສປ່າໄມ້ຂຽວ ທ່ອງທ່ຽວໜອງຟ້າ ຊົມຜາຮຽງຊານໄຊ ໄຫ້ວພຣະອົງແສນ ພັກແດນສາມັກຄີ ”.
ຂໍ້ມູນຈາກ: ກົມໂຄສະນາການທ່ອງທ່ຽວ