ໃກ້ໆຈະຮອດເທສະການ ດອກງີ້ວບານແລ້ວ ປີນີ້ໄດ້ຈັດຂຶ້ນເປັນປີທີ 17 ຊຶ່ງຈະໄດ້ຈັດຂຶ້ນໃນລະຫວ່າງວັນທີ 4-12 ກຸມພາ 2017 ນີ້ ຢູ່ດອນຊາວ, ເຂດເສດຖະກິດພິເສດສາມຫຼ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ ແລະ ເປີດງານຢ່າງເປັນທາງການແມ່ນວັນທີ 10 ກຸມພາ 2017.
ງານເທດສະການດອກງິ້ວບານ ແມ່ນປາງບຸນໜຶ່ງທີ່ສໍາຄັນຂອງປະຊາຊົນບັນດາເຜົ່າ ຊາວເມືອງຕົ້ນເຜີ້ງ ກໍ່ຄືຂອງຊາວ ແຂວງບໍ່ແກ້ວ ທີ່ໄດ້ຈັດຂຶ້ນທຸກໆປີ. ງານດັ່ງກ່າວມັນໄດ້ສ່ອງແສງໃຫ້ເຫັນເຖິງແບບແຜນດໍາລົງຊີວິດ, ຮີດຄອງປະເພນີອັນດີງາມ, ຄວາມດຸໝັ່ນຫ້າວຫັນໃນການອອກແຮງງານທຳການຜະລິດຕິດພັນກັບການອະນຸລັກຮັກສາທຳມະຊາດ-ສິ່ງແວດລ້ອມ, ແນໃສ່ສົ່ງເສີມການທ່ອງທ່ຽວທຳມະຊາດ (ປ່າດອກງິ້ວບານ ດອນຊາວ), ທ່ອງທ່ຽວດ້ານວັດທະນະທຳ (ຮີດຄອງປະເພນີ 13 ຊົນເຜົ່າ ຂອງແຂວງບໍ່ແກ້ວ)
ພາຍໃນງານຈະມີກິດຈະກຳຫຼາຍຢ່າງເຊັ່ນ: ເລີ່ມແຕ່ວັນທີ 4 ຈະມີບັນດາບໍລິສັດຫ້າງຮ້ານ, ຫົວໜ່ວຍການຜະລິດ, ທຸລະກິດ ແລະ ບັນດາເມືອງ ນຳເອົາສິນຄ້າຜະລິດຕະພັນກະສິກຳ, ອຸດສາຫະກຳ, ສິນຄ້າໂອດອບ, ພືດຜັກປອດສານພິດ ຫຼາຍປະເພດມາວາງຂາຍ. ຊຶ່ງຈະປະກອບໄປດ້ວຍອາຫານການກິນທີ່ເປັນເອກະລັກຂອງບັນດາເຜົ່າ. ຄາດວ່າຈະມີຫ້ອງວາງສະແດງສິນຄ້າ ປະມານ 100 ກວ່າຫ້ອງ, ມີຊົມການແຂ່ງຂັນກິລາພື້ນເມືອງ ງົວຊົນງົວ, ມ້າຊົນມ້າ, ມວຍລາຍຈີນ, ມີການສະແດງສິລະປະວັນນະຄະດີຂອງຊົນເຜົ່າຕ່າງໆໃນແຂວງບໍ່ແກ້ວ ແລະ ມີນັກສິລະປິນທັງພາຍໃນແຂວງ, ຈາກສູນກາງ ແລະ 3 ປະເທດໃກ້ຄຽງ ຄື: ສປ ຈີນ, ສສ ມຽນມາ ແລະ ລາຊາອານາຈັກໄທ ມາຮ່ວມສະແດງນຳ
ນອກນີ້, ຍັງມີການປະກວດນາງສາວດອກງີ້ວບານ ໂດຍໄດ້ຄັດເລືອກເອົານາງສາວງາມ ຈໍານວນ 20 ນ້ອງ ຈາກບັນດາເມືອງ, ບັນດາບ້ານ ທີ່ເປັນຕົວແທນຂອງແຕ່ລະເຜົ່າ ຮອບທຳອິດມື້ເປີດງານ (ວັນທີ 10) ແລະ ຮອບຕັດສິນ ມື້ສຸດທ້າຍ (ວັນທີ 12) ແລະ ຍັງມີການສະແດງການເດີນແບບແຕ່ງກາຍຂອງ 13 ຊົນເຜົ່າ ທີ່ມີຢູ່ໃນແຂວງບໍ່ແກ້ວ ເພື່ອຍ່າງສະແດງເທິງເວທີ ພ້ອມທັງມີການເລົ່າປະຫວັດຫຍໍ້ຄວາມເປັນມາຂອງແຕ່ລະເຜົ່າ.
ອັນທີ່ສໍາຄັນ ເພື່ອເຮັດໃຫ້ການຈັດງານຄັ້ງນີ້ມີເນື້ອໃນຄວາມໝາຍນັ້ນ ຍັງຈະໄດ້ຈັດໃຫ້ມີກອງປະຊຸມສຳມະນາໃນຫົວຂໍ້ ‘‘ເຊື່ອມໂຍງການທ່ອງທ່ຽວແບບຢືນຍົງ” ກອງປະຊຸມຈະໄດ້ແລກປ່ຽນຄຳຄິດຄຳເຫັນ, ໂຄສະນາດຶງດູດການລົງທຶນ, ຄົ້ນຄວ້າວິໄຈ ກ່ຽວກັບການພັດທະນາວຽກງານທ່ອງທ່ຽວ (ການພັດທະນາພື້ນການໂຄງລ່າງການທ່ອງທ່ຽວ, ການບໍລິການທ່ອງທ່ຽວ ແລະ ພັດທະນາເສັ້ນທາງການທ່ອງທ່ຽວ). ພ້ອມນີ້ກໍຈະໄດ້ມີການເຊັນບົດບັນທຶນຄວາມເຂົ້າໃຈ (MOU) ການຮ່ວມມືເຊື່ອມໂຍງກັນ ດ້ານວຽກງານທ່ອງທ່ຽວ ຂອງ 12 ແຂວງ 5 ປະເທດ ຄື: 6 ແຂວງພາກເໜືອຂອງລາວ ມີ ບໍ່ແກ້ວ, ຫຼວງນໍ້າທາ, ອຸດົມໄຊ, ຜົ້ງສາລີ, ຫຼວງພະບາງ, ໄຊຍະບູລີ ແລະ 6 ແຂວງຂອງປະເທດໃກ້ຄຽງຄື: ກິ່ງແຂວງສິບສອງພັນນາ ສປ ຈີນ, ດຽນບຽນຟູ, ເຊີນລາ ສສ ຫວຽດນາມ, ຊຽງຣາຍ, ຊຽງໃໝ່ ປະເທດໄທ ແລະ ແຂວງທ່າຂີ້ເຫຼັກ ສສ ມຽນມາ. ກອງປະຊຸມສໍາມະນາຄັ້ງນີ້ ຈະເປັນການກະຕຸກຊຸກຍູ້ວຽກງານການທ່ອງທ່ຽວຢູ່ແຂວງບໍ່ແກ້ວ ກໍຄືບັນດາແຂວງໃກ້ຄຽງໃຫ້ຄຶກຄັກຂຶ້ນ ໄປຕາມທິດ ທີ່ແຂວງບໍ່ແກ້ວໄດ້ຖືເອົາການທ່ອງທ່ຽວ ແລະ ການບໍລິການເປັນໃຈກາງຂອງການພັດທະນາ.
ທັງໝົດນັ້ນແມ່ນແຜນການກະກຽມຈັດງານ ເທສະການ ດອກງີ້ວບານ ໃນປີນີ້ ຖ້າໃຜຍັງບໍ່ທັນວາງແຜນໄປທ່ຽວໃສ ລອງໄປທ່ຽວງານເທສະການບຸນປະຈໍາປີແຫ່ງນີ້ລອງເບິ່ງຮັບຈະບໍ່ຜິດຫວັງ ໄປແລ້ວຕ້ອງຢາກໄປອີກຢ່າງແນ່ນອນ.