Kuanjai Magazine
Becoming ສາລະຄະດີຂອງ Michelle Obama ສະຕຣີໝາຍເລກ 1 ທີ່ສອນໃຫ້ເຮົາຄວນຍົກຍ່ອງແມ່ຍິງ ແລະຄົນຜິວສີໃຫ້ຫຼາຍກວ່ານີ້ “ການເປັນສະຕຣີໝາຍເລກ 1 ຕ້ອງແລກມາດ້ວຍຊີວິດທີ່ບໍ່ມີອິດສະຫຼະ, ໄດ້ຖິ້ມເວລາສ່ວນຕົວທີ່ແມ່ຍິງທໍາມະດາຄົນໜຶ່ງເຄີຍມີ”
ຜ່ານມາຫຼາຍປີທີ່ຂວັນໃຈ ເຮັດໜ້າທີ່ເປັນສື່ຫຼັກໃນການຊຸກຍູ້ບົດບາດຂອງ “ແມ່ຍິງ” ພວກເຮົາໄດ້ນໍາສະເໜີເລື່ອງລາວຂອງແມ່ຍິງເກັ່ງໆທັງພາຍໃນ ແລະ ຕ່າງປະເທດ ໃນຫຼາກຫຼາຍສາຂາອາຊີບ ເພື່ອສົ່ງຕໍ່ພະລັງບວກ ແລະເປັນແຮງບັນດານໃຈໃຫ້ກັບແມ່ຍິງລາວຫຼາຍໆຄົນ… ລວມທັງເລື່ອງລາວຂອງແມ່ຍິງທີ່ຂຶ້ນຊື່ວ່າ ເປັນອະດີດສະຕຣີໝາຍເລກ 1 ຂອງໂລກຄື ທ່ານນາງ ມີສເຊວ ໂອບາມາ ພັນລະຍາຂອງທ່ານ ບາຣັກ ໂອບາມາ ອະດີດປະທານາທິບໍດີ ສ.ອາເມຣິກາ ທີ່ມີບົດບາດໃນການສົ່ງເສີມແມ່ຍິງທົ່ວໂລກ ໂດຍສະເພາະແມ່ຍິງຜິວສີໃຫ້ມີບ່ອນຢືນໃນສັງຄົມ ແລະ ກ້າອອກໄປໃຊ້ຊີວິດໃນສັງຄົມໄດ້ຢ່າງໝັ້ນໃຈ!! ແຕ່ກໍອາດຈະມີບາງຄົນທີ່ບໍ່ເຂົ້າໃຈ ແລະ ເບິ່ງໃນມຸມທີ່ຕ່າງໄປຄື ຍ້ອນນາງເປັນພັນລະຍາຂອງປະທານາທິບໍດີ ນາງຈຶ່ງສາມາດເປັນສະຕຣີໝາຍເລກ 1 ໄດ້? ນາງເຮັດໄດ້ຍ້ອນນາງມີຊີວິດທີ່ສຸກສະບາຍຢູ່ແລ້ວ ແລະນາງເລືອກທີ່ຈະເປັນແບບນີ້ເອງ… ແຕ່ມີໃຜເຄີຍຖາມບໍ່ວ່າ ມິສເຊວ ກົງໆບໍ່ວ່າ ນາງຢາກເປັນສະຕຣີໝາຍເລກ 1 ບໍ່? ເພາະການເປັນສະຕຣີໝາຍເລກ 1 ຕ້ອງແລກມາເຊິ່ງຊີວິດອິດສະຫຼະທຸກໆຢ່າງທີ່ເຄີຍເປັນມາ, ຕ້ອງໄດ້ຖີ້ມເວລາສ່ວນຕົວທີ່ເຄີຍມີ ແຕ່ເປັນຍ້ອນເປັນຄວາມຕ້ອງການຂອງສາມີຄື ບາຣັກ ໂອບາມາ ແລະ ຍ້ອນຄວາມຮັກ ນາງຈຶ່ງຍອມເສຍສະຫຼະໃຫ້… ເລື່ອງລາວນີ້ໄດ້ຖືກຖ່າຍທອດອອກມາຜ່ານ ສາລະຄະດີ “Becoming ຂອງ ມິສເຊວ ໂອບາມາ“ ຖ້າໃຜໄດ້ເບິ່ງຈະຮູ້ໄດ້ເລີຍວ່າ ມິສເຊວ ໂອບາມາ ເໝາະສົມກັບຕໍາແໜ່ງສະຕຣີໝາຍເລກ 1 ແທ້ບໍ່? ເປັນຫຍັງຈຶ່ງຕ້ອງຕໍ່ສູ້ເພື່ອແມ່ຍິງຜິວສີ? ໃນການໃຊ້ຊີວິດໃນສັງຄົມແມ່ຍິງຜິວສີຕ້ອງພົບ ແລະ ຕໍ່ສູ້ກັບຫຍັງແດ່? ມື້ນີ້ຂວັນໃຈກໍມີຕົວຢ່າງມາໃຫ້ເບິ່ງນໍາ ແຕ່ສະບັບເຕັມແມ່ນໄປຊອກເບິ່ງກັນເອງເດີ້!! 555++
