ການເກັບອອມເງິນຂອງມະນຸດເງິນແບບເຮົານັ້ນ ບໍ່ໄດ້ງ່າຍເລີຍ ແຕ່ກໍບໍ່ແມ່ນເລື່ອງທີ່ຍາກເກີນໄປ ເພາະວ່າ ທີ່ຈິງແລ້ວຖ້າວ່າເຮົາມີການວາງແຜນການເງິນທີ່ດີ ເຮົາຈະສາມາດເກັບອອມໄດ້ຢ່າງງ່າຍດາຍ ເພາະເຮົາມີລາຍໄດ້ທີ່ແນ່ນອນນັ້ນເອງ ດັ່ງນັ້ນ, ສາວໆທັງຫຼາຍ ເຮົາມາປ່ຽນພຶດຕິກໍາການໃຊ້ເງິນ ແລະ ມີວິໄນໃນການປະຢັດເງິນກັນດີບໍ! ມື້ນີ້ ທາງຂວັນໃຈມີຄໍາແນະນໍາດີໆໃນການເກັບອອມເງິນມາຝາກສາວໆ ຮັບຮອງວ່າເທື່ອນີ້ ເຮົາຈະຫ່າງໄກຈາກຄໍາວ່າເງິນເດືອນຊົນເດືອນກັນເລີຍ
- ເກັບກ່ອນ ເຫຼືອເທົ່າໃດແລ້ວຈຶ່ງຄ່ອຍໃຊ້
ຫຼາຍຄົນຍັງມັກທີ່ຈະໃຊ້ເງິນກ່ອນ ເຫຼືອເທົ່າໃດຈຶ່ງຄ່ອຍອອມ ແລ້ວສຸດທ້າຍເປັນແນວໃດ ບໍ່ເຫຼືອໃຫ້ເກັບເລີຍ ເຮົາຄວນແຍກເງິນອອກເປັນສ່ວນໆ ເຮົາອາດຈະເລີ່ມຈາກການເກັບອອມລາຍໄດ້ 10-15% ຂອງທຸກເດືອນ ທີ່ເຫຼືອໃຫ້ແບ່ງອອກເປັນສ່ວນໆໃນຄ່າໃຊ້ຈ່າຍຕ່າງໆ ແຕ່ທີ່ຂາດບໍ່ໄດ້ ຄວນມີເງິນເກັບສຸກເສີນໄວ້ ເມື່ອເກີດເລື່ອງບໍ່ຂາດຄິດເຮົາຈຶ່ງຈະໝົດກັງວົນເອງ ເຊິ່ງວິທີນີ້ຈະເຮັດໃຫ້ເຮົາຈັດສັນເງິນເກັບຂອງເຮົາໄດ້ດີຂຶ້ນ
- ຫຼຸດຄວາມຢາກ ແລະ ຕັ້ງເປົ້າໝາຍ
ຫຼຸດການສອດສ່ອງສາຍຕາເບິ່ງຫາປ້າຍຂອງ Sale ຫຼືສ່ອງສິນຄ້າອອນລາຍ ເພາະມັນເປັນສັດຕູອັນໂຫດຮ້າຍຂອງການເກັບເງິນຂອງເຮົາ ດັ່ງນັ້ນ ຈົ່ງຢຸດ… ພຶດຕິກໍານັ້ນສາ!!! ຫັນມາຕັ້ງເປົ້າງ່າຍໆ ເພື່ອການເກັບອອມເງິນ ເຊັ່ນ ຕັ້ງເປົ້າວ່າ ເກັບເງິນຄັ້ງນີ້ໄວ້ເພື່ອຫຍັງ ແລະ ທ້າທາຍຕົນເອງດ້ວຍເປົ້າໝາຍໄລຍະສັ້ນ ແລະ ໄລຍະຍາວຕາມລໍາດັບ
- ບໍ່ຕົກເປັນທາດຂອງບັດເຄຣດິດ
ການໃຊ້ບັດເຄຣດິດບໍ່ແມ່ນເລື່ອງຜິດ ແຕ່ເມື່ອໃຊ້ແລ້ວກໍຕ້ອງມີວິໄນໃນການໃຊ້ຈ່າຍ ໂດຍສະເພາະການຈ່າຍຂັ້ນຕໍ່ານັ້ນເປັນສິ່ງທີ່ບໍ່ຄວນເຮັດເປັນຢ່າງຍິ່ງ ເພາະມັນຈະເພີ່ມພູນດອກເບ້ຍໃຫ້ເຮົາ ຈົນກາຍເປັນໜີ້ກ້ອນໃຫຍ່ໄດ້ໂດຍບໍ່ຮູ້ຕົວ
- ປ່ຽນໂບນັດເປັນເງິນເກັບ
ການເລີ່ມຕົ້ນເກັບເງິນກ້ອນໃຫຍ່ທີ່ດີທີ່ສຸດນັ້ນ ກໍຄືການເກັບຈາກໂບນັດນັ້ນເອງ ລອງປ່ຽນຈາກແຜນທີ່ຈະເອົາໂບນັດໄປໃຊ້ຈ່າຍ ເປັນການເກັບເງິນໂບນັດ ນອກຈາກຈະໄດ້ເງິນເກັບກ້ອນໃຫຍ່ແລ້ວ ຍັງເປັນການສ້າງກໍາລັງໃຈໃນການເກັບອອມໃຫ້ເຮົາໄດ້ຢ່າງນ່າປະຫຼາດໃຈ
- ຮຽນຮູ້ທີ່ຈະລົງທຶນ
ແນ່ນອນວ່າທຸກການລົງທຶນນັ້ນມີຄວາມສ່ຽງ ແຕ່ຖ້າເຮົາຮູ້ຈັກລົງທຶນ ແລະ ສຶກສາການລົງທຶນຕ່າງໆໃຫ້ດີສາກ່ອນ ຈາກຄວາມສ່ຽງກໍອາດຈະກາຍເປັນຜົນກຳໄລຢ່າງງາມໃຫ້ກັບເຮົາໄດ້ເຊັ່ນກັນ.
ຄົງຈະບໍ່ແມ່ນເລື່ອງທີ່ຍາກຈົນເກີນໄປສໍາລັບ 5 ວິທີການເກັບອອມເງິນຂອງສາວ Office ທີ່ເຮົານໍາມາຝາກ ເພາະການເກັບອອມເງິນນັ້ນ ນອກຈາກຈະເຮັດໃຫ້ເຮົາສະບາຍໃນອະນາຄົດແລ້ວ ການເກັບເງິນຍັງສາມາດຊ່ວຍໃຫ້ເຮົາມີເງິນໃຊ້ໃນຍາມຈໍາເປັນໄດ້. ເພາະສະນັ້ນ, ເຮົາມາເລີ່ມຕົ້ນເກັບເງິນກັນເນາະສາວໆ ຈັງໃດ! ຂວັນໃຈ ກໍຂໍເປັນກຳລັງໃຈໃຫ້ກັບທຸກຈຸດເລີ່ມຕົ້ນໃນການເກັບເງິນຂອງສາວໆເດີ້!!!