Kuanjai Magazine
ບາງຄັ້ງເຮົາອາດຄິດວ່າ: “ເຮົາສຸດຍອດແລ້ວໄດ໋” ກັບຄົນຮັກຄົນນີ້ ເພາະມີຫລາຍຢ່າງທີ່ເຮົາເຮັດໄດ້ດີ ແລະ ດີທີ່ສຸດໃນເລື່ອງຂອງຄວາມຮັກ ຈະແມ່ນດ້ວຍຄວາມດີຄວາມງາມ, ການເອົາໃຈໃສ່ເບິ່ງແຍງຫົວໃຈ ແລະ ເສຍສະຫລະທຸກສິ່ງຢ່າງເພື່ອເຮັດໃຫ້ຄົນທີ່ເຮົາຮັກໄດ້ສົມຫວັງ ເຖິງວ່າມີບາງສະຖານະການ ຄາລົມຄົມຄາຍອາດຈະບໍ່ຫວານ, ພອນສະຫວັນໃນເລື່ອງຂອງຄວາມຮັກອາດຈະບໍ່ກິນໃຈ ທັງບໍ່ສາມາດສ້າງສັນຮອຍຍິ້ມໃຫ້ກັບຄົນຮັກ ໃນແບບທີ່ລາວຢາກໄດ້ ເຮົາເຄີຍທຸ່ມເທສ້າງຄຸນງາມຄວາມດີ ເພື່ອໃຫ້ຄົນທີ່ຢູ່ອ້ອມຂ້າງເຮົາໄດ້ມີຄວາມສຸກ ແຕ່ພໍເວລາມີໃຜຄົນໃດຄົນໜຶ່ງທີ່ວິເສດກວ່າ ເຂົ້າມາໃນຊີວິດ ຊ້ຳພັດເຮັດໃຫ້ທິດທາງ ແລະ ວິຖີຊີວິດທັງໝົດປ່ຽນແປງໄປ ຈາກທີ່ທຸ່ມເທໃຫ້ກັບຄົນຄົນນີ້ ເຮົາພັດຕ້ອງໄດ້ສຸມໃສ່ໜ້າທີ່ວຽກງານ ເຮົາຈຳເປັນຕ້ອງບິແບ່ງເວລາ ແບ່ງຄວາມຄິດ, ບິແບ່ງເປົ້າໝາຍໃນຊີວິດ ແລ້ວມຸ່ງຄວາມສຳຄັນມາທີ່ເຂົາຄົນນັ້ນເພີ່ມຂຶ້ນ ເພາະເຂົາໄດ້ມີສ່ວນຮ່ວມເຂົ້າມາໃນຊີວິດດ້ວຍຄວາມຜູກພັນໂດຍທີ່ບໍ່ໄດ້ຄາດຄິດ.
ເລີ່ມຕົ້ນທີ່ເຂົາເຂົ້າມາ ເຂົາກໍຍັງໃຫ້ກຽດ, ມີຄວາມເຄົາລົບນັບຖື ແລະ ສະແດງບົດບາດພຽງເລັກນ້ອຍໃຫ້ເຮົາເຫັນພໍຫອມປາກຫອມຄໍ ແລ້ວກໍຄ່ອຍໆມີບົດບາດຫລາຍຂຶ້ນໆໃນເວລາຕໍ່ມາ ຈົນບາງຄັ້ງເຮົາເອງກໍເກືອບຈະບໍ່ຮູ້ໂຕເລີຍວ່າ “ຊີວິດຂອງເຮົາລ້ວນແຕ່ກ້ຽວວຽນຢູ່ກັບເຂົາ, ດຳເນີນຊີວິດຮ່ວມກັບເຂົາ ແລະ ຢູ່ໃນໂລກແຫ່ງຄວາມຮັກຂອງເຂົາ ໝາຍວ່າລົມຫາຍໃຈເຂົ້າອອກ ລ້ວນແຕ່ມີເຂົາເຂົ້າມາກ່ຽວຂ້ອງ.
ໃນຍາມທີ່ເລີ່ມຮັກກັນໃໝ່ ຄວາມຫວານເຮັດໃຫ້ເຮົາມີຄວາມສຸກໄດ້ໃນທຸກໆມື້ ແຕ່ພໍການເວລາເດີນຜ່ານໄປ ຄວາມຮັກທີ່ເຄີຍສົດຊື່ນແຈ່ມໃສ ກໍຄ່ອຍໆມີບັນຍາກາດຂອງຄວາມສະຫລັບສັບຊ້ອນ, ໃສ່ໃຈໜ້ອຍລົງ ແລະ ຈືດຈາງຫ່າງເຫີນ ສະນັ້ນ, ຢາກໃຫ້ຄົນຮັກເຫັນຄວາມສຳຄັນ ກໍຈົ່ງສ້າງຄຸນຄ່າໃຫ້ກັບຕົວເຮົາເອງຢູ່ສະເໝີ ພະຍາຍາມເຮັດໃຫ້ຄົນຮັກແນມເຫັນສິ່ງໃໝ່ໆ ທີ່ລີ້ຊ່ອນຢູ່ໃນຕົວຂອງເຮົາຕະຫລອດເວລາ. ຈະເຮັດໄດ້ແນວໃດແມ່ນບໍ່ ? ລອງຫລຽວຫລັງ ຫັນກັບມາເບິ່ງເລື່ອງລາວດີໆໃນອະດີດ ແລ້ວລວມພະລັງເລີ່ມຕົ້ນອີກເທື່ອໜຶ່ງ ເປັນຫຍັງ? ມື້ທຳອິດທີ່ພົບກັນ ເຮົາຈຶ່ງສ້າງຄຸນຄ່າ ແລະ ຄວາມມີຊີວິດຊີວາໃຫ້ກັບຄວາມຮັກໄດ້.
ຮູ້ບໍ່ ! ຄົນອ້ອມຂ້າງທີ່ຫຸ້ມລ້ອມ ກຳລັງແນມເບິ່ງເຮົາດ້ວຍຄວາມເຫັນໃຈ, ຫ່ວງໃຍ ແລະ ພ້ອມຈະໃຫ້ກຳລັງໃຈສະເໝີ. ທຸກຄົນລ້ວນແຕ່ຮັກເຮົາ ແລ້ວເປັນຫຍັງ ເຮົາບໍ່ຮັກຕົນເອງແດ່ ຄວາມສຳເລັດກໍກຳລັງລໍຖ້າເຮົາ ພ້ອມໃຫ້ເຮົາໄດ້ສຳພັດ… ແລ້ວຖ້າເຮົາບໍ່ມີປະໂຫຍດ ຫລື ຄຸນຄ່າອັນໃດໃຫ້ກັບຄົນອ້ອມຂ້າງ ຈະມີໃຜທີ່ຢາກຈະໃຫ້ໂອກາດເລື້ອຍໆ ຫລື ຢາກຮູ້ຈັກ, ຢາກຄົບຄ້າສະມາຄົມ ແລະ ຫັນມາຊ່ວຍເຫລືອເຮົາ. ເຮົາຕ້ອງມີຊີວິດຢູ່ເພື່ອຄວາມຮັກ ແລະ ຢູ່ໃຫ້ສົມສັກສີ ໃຫ້ການຢູ່ຂອງເຮົາສ້າງຄວາມໝາຍກັບການຢູ່ຂອງຄົນອ້ອມຂ້າງ ແລະ ໃຫ້ການຢູ່ຂອງເຮົາ ພາໃຫ້ເກີດຄຸນຄ່າໃນໜ້າທີ່ວຽກງານຢ່າງແທ້ຈິງ.
ເຮົາຮ້ອງເພງມ່ວນໃນຍາມທີ່ງຽບເຫງົາ ເຮົາສາມາດແຕ້ມແຕ່ງໂລກອ້ອມຂ້າງດ້ວຍຈິນຕະນາການ ຫົວໜ້າຍ້ອງຍໍ ເພື່ອນຮ່ວມງານໃຜໆກໍຮັກ, ເຮົາມີສອງມືສອງຂາ ແລະ ໜຶ່ງດວງໃຈ ທີ່ເຕັມໄປດ້ວຍພະລັງ ບໍ່ດ້ອຍກວ່າໃຜ ມີໃຜບໍ່ທີ່ບໍ່ເຄີຍເກີດຄວາມທໍ້ຖອຍ ຫລື ບໍ່ເຄີຍສຳພັດກັບຄວາມຜິດຫວັງ ສິ່ງສຳຄັນ ເມື່ອລົ້ມແລ້ວ ຕ້ອງລຸກຂຶ້ນຕໍ່ສູ້ດ້ວຍຄວາມກະຕືລືລົ້ນ, ອົງອາດກ້າຫານ ແລະ ເຊື່ອໝັ້ນ ບໍ່ມີຫຍັງເປັນຕາຢ້ານພໍພິລຶກດອກ ເຖິງບໍ່ມີໃຜຮັກ ບໍ່ມີໃຜຫວັງດີນຳ ແຕ່ຊີວິດກໍຕ້ອງກ້າວເດີນຕໍ່ໄປ ເຖິງແມ່ນວ່າຈະບໍ່ມີໃຜເຫັນ ແລະ ຍ້ອງຍໍຊົມເຊີຍ ໃນເມື່ອຍັງມີອີກຫລາຍໆຄົນຍັງຢາກເຫັນຄວາມສຳເລັດຂອງເຮົາ ບອກຕົນເອງໂລດວ່າ “ເຮົາເຮັດດີທີ່ສຸດແລ້ວ”
