Kuanjai Magazine
ເບື່ອແລ້ວແມ່ນບໍ່ກັບຊີວິດໃນເມືອງໃຫຍ່ ໂດຍສະເພາະແມ່ນນະຄອນຫລວງ ທີ່ຕ້ອງລຸກແຕ່ເຊົ້າ ຟ້າວຟັ່ງໄປເຮັດວຽກ ໄປໃສກໍຍາກ ຍ້ອນລົດຕິດ ທ້າຍອາທິດຜູ້ຄົນແອອັດ ແລະ ວຸ້ນວາຍຕາມສະຖານທີ່ຕ່າງໆ ສະນັ້ນ ມື້ນີ້ ຈະພາທຸກຄົນມາຮູ້ຈັກກັບ ເມືອງທີ່ກົງກັນຂ້າມກັບສິ່ງທີ່ເວົ້າມາຂ້າງເທິງ ນັ້ນກໍຄືເມືອງທ່າແຂກ ແຂວງຄຳມ່ວນນັ້ນເອງ.
ເມືອງທ່າແຂກເປັນເມືອງເອກຂອງແຂວງຄຳມ່ວນ ເຊິ່ງຕັ້ງຢູ່ແຄມແມ່ນ້ຳຂອງ ກົງກັນຂ້າມກັບຈັງຫວັດນະຄອນພະນົມ ປະເທດໄທຫ່າງຈາກນະຄອນຫລວງວຽງຈັນພຽງ 335 ກິໂລແມັດເທົ່ານັ້ນ ໃຊ້ເວລາເດີນທາງ ທາງລົດປະມານ 4-5 ຊົ່ວໂມງກໍ່ຮອດແລ້ວ. ເທື່ອນີ້ເຮົາມີເວລາຂ້ອນຂ້າງຈຳກັດ ຄື 2 ມື້ 1 ຄືນ ເລີຍຈະພາທ່ຽວຊົມສະເພາະຕົວເມືອງເກົ່າສະໄໝຝຮັ່ງປົກຄອງ. ພວກເຮົາເລີ່ມອອກເດີນທາງຈາກນະຄອນຫລວງ ມຸ່ງໜ້າລົງໃຕ້ແຕ່ເຊົ້າ ຖ້າໃຜສະດວກນັ່ງລົດເມໄປກໍງ່າຍດີ ພຽງແຕ່ໄປຂຶ້ນລົດຢູ່ຄິວສາຍໃຕ້ ແລ້ວຫາເຊົ່າລົດຈັກຢູ່ທ່າແຂກ ເພິ່ນກໍມີບໍລິການໃຫ້ເຊົ່າລົດຢູ່ ຫຼືຈະຂັບລົດໃຫຍ່ມາເອງກໍຍິ່ງສະດວກຂຶ້ນໄປອີກ. ເມື່ອກ້າວເຂົ້າເຂດແຂວງຄໍາມ່ວນ ເຮົາຈະພົບເຫັນພູພາສະຫຼັບຊັບຊ້ອນໄກໆ
ກ່ອນຈະເຂົ້າສູ່ຕົວເມືອງທ່າແຂກ ເບື້ອງຂວາມືເຮົາຈະຜ່ານຂົວຂ້າມແມ່ນ້ຳຂອງແຫ່ງທີ່ສາມຂອງລາວ ສາມາດແວ່ເຂົ້າເບິ່ງ ແລະທ່ຽວຊົມໄດ້ ພໍອອກຈາກຂົວຂີ່ລົດຕໍ່ມີອີກປະມານ 20 ນາທີ ແຍກໄປທາງຂວາກໍຮອດຕົວເມືອງ ພວກເຮົາເລືອຫາບ່ອນພັກກ່ອນເລີຍ ບ່ອນພັກມີໃຫ້ເລືອກຫຼາກຫຼາຍ ຕັ້ງແຕ່ລະດັບໂຮງແຮມ ໄປຈົນຮອດ Homestay ພວກເຮົາເລືອກນອນໃກ້ແຄມຂອງ ເພື່ອຈະໄດ້ຊົມວິວ ຍ່າງເລາະຫລິ້ນຕົວເມືອງ ເລາະຕະຫລາດນ້ຳພຸໃນຍາມກາງຄືນ
ພວກເຮົາຮອດບ່ອນພັກ ເວລາທ່ຽງພໍດີເລີຍ ຊອກຫຍັງກິນໃກ້ໆແຖວນັ້ນ ເຫັນຮ້ານປີ້ງໄກ່ຕຳໝາກຫຸ່ງແຄມແມ່ນ້ຳຂອງ ທີ່ເປັນຊານອອກໄປ ສາຍລົມພັດເຢັນສະບາຍ ເຮືອແລ່ນກາຍໄປກາຍມາສອງຝັ່ງແມ່ນ້ຳຂອງ ບອກໄວ້ກ່ອນເລີຍເດີ້ວ່າ ແຄມຂອງທ່າແຂກວິວງາມຫຼາຍ ເປັນຕາເລາະ ເບີ່ງໆໄປອີກຫຼາຍໆບ່ອນແຄມຂອງແຫ່ງນີ້ກໍຄ້າຍຄື ເມືອງມໍລະດົກໂລກຢ່າງຫຼວງພະບາງໃດ ຖ້າໃຜເຄີຍໄປທ່ຽວຫຼວງພະບາງມາແລ້ວ ຈະຮູ້ສຶກໄດ້ວ່າຄືແບບໃດ ຫຼັງຈາກກິນເຂົ້າພັກຜ່ອນໜ້ອຍໜຶ່ງ ກໍພາກັນຍ່າງເລາະຊົມຕົວເມືອງທ່າແຂກ ຖ່າຍຮູບບັນດາຕຶກອາຄານສະໄໝອານານິຄົມເກົ່າໆ ສິລະປະແບບຝະລັ່ງ ທີ່ຍັງຄົງຫຼົງເຫຼືອໄວ້ໃຫ້ພວກເຮົາໄດ້ເຫັນ
ຍ່າງເລາະໆໄປຮູ້ສຶກຮ້ອນໆ ແວ່ຊິມກາເຟຟັງເພງເບົາໆ ນັ່ງຕາກແອເຢັນໆແນມອອກໄປຂ້າງນອກ ແນມເບິ່ງວີວທີ່ຢູ່ຕໍ່ໜ້າເຮົາຄືຕືກເກົ່າແລ້ວຍິ່ງເພີນຕາໄປອີກແບບ. ຄ່ຳໆພວກເຮົາບໍ່ພາດທີ່ຈະມາຍ່າງເລາະກິນເຂົ້າແລງ ທີ່ຕະຫຼາດລາຕີ ທີ່ນີ້ແມ່ນຈຸດລວມຕົວຂອງຄົນທ່າແຂກ ແລະນັກທ່ຽວທ່ອງເລີຍກໍວ່າໄດ້ ເພາະເປັນບໍລິເວນທີ່ລວມຂອງກິນຫຼາກຫຼາຍຊະນິດແຊບໆໄວ້ ອ້ອມແຖວໆຕະຫຼາດລາຕີມີຮ້ານກິນດື່ມ ນ່ັງຫຼິ້ນ ບັນຍາກາດດີໆ ເພງມ່ວນໆ ຕົບແຕ່ງແປກຕາຢູ່ຫຼາຍຮ້ານເດີ້ ຖ້າໃຜສົນໃຈບັນຍາກາດແບບນີ້ກໍມີໃຫ້ຟິນໆກັນ ມື້ນີ້ພວກເຮົາຂໍໂຕໄປນອນກ່ອນອີ່ມຫຼາຍໆ.
ມື້ທີ 2 ໃນເມືອງທ່າແຂກ ພວກເຮົາພາກັນຕື່ນແຕ່ເຊົ້າໆ ສູດອາດກາດດີໆ ເລາະເກັບພາບບັນຍາກາດຕອນເຊົ້າໃນຕົວເມືອງແຖວໆບ່ອນພັກ ເຮົາເຫັນພາບຄູບາຍ່າງບິນທະບາດເປັນສາຍ ຕາມເສັ້ນແຄມຂອງ ແລະເສັ້ນໃນເມືອງ ຊ່າງງາມຕາອີ່ຫຼີ ມີປະຊາຊົນອອກມາໃສ່ບາດກັນຢ່າງຫຼວງຫຼາຍ ເຫັນແລ້ວອົດບໍ່ໄດ້ທີ່ຈະຖ່າຍຮູບເກັບໄວ້ເປັນຄວາມຊົງຈຳ. ຍ່າງເລາະເມື່ອຍໆກໍກັບມາຫ້ອງພັກ ອາບນ້ຳໄປກິນເຂົ້າເຊົ້າ ແນ່ນອນວ່າມາຮອດທ່າແຂກສິ່ງທີ່ຕ້ອງບໍ່ພາດ ກໍຄືຍຳໂຕ່ງ ແຕ່ຕອນນີ້ຍັງບໍ່ກິນເທື່ອ ເຮົາຈະໄປກິນເຂົ້າປຽກໄກ່ລາດກັນກ່ອນເລີຍ ແຊບອາຫຼີເດີ້ ຮ້ານນີ້ຄອນເຟີມເລີຍ ເປັນຮ້ານທີ່ຂາຍແຕ່ເຂົ້າປຽກເສັ້ນຢ່າງດຽວເດີ້ ເຝີໝີ່ບໍ່ມີ. ພິກັດແມ່ນຢູ່ໜ້າຮ້ານສະກາຍບາ ຫາຈາກລຸງກູເກິ້ນເລີຍ (Google map) ງ່າຍຊຳປອກກ້ວຍເຂົ້າປາກເລີຍ ນອກຈາກຮ້ານເຂົ້າປຽກ
ເປົ້າໝາຍຕໍ່ໄປແມ່ນເດີນທາງໄປວັດພະທາດສີໂຄດຕະບອງ (ທາດເມືອງເກົ່າ) ຫ່າງຈາກຕົວເມືອງອອກມາ6 ກິໂລແມັດ ເປັນປູຊະນີຍະສະຖານທີ່ເກົ່າແກ່ ແລະເປັນບ່ອນສັກຄາລະບູຊາຂອງຄົນແຂວງຄຳມ່ວນ ທີ່ມີຄວາມສັກສິດ ມາຮອດທ່າແຂກແລ້ວ ຕ້ອງມາກາບໄຫວ້ຂໍພອນ ເພື່ອສິຣິມົງຄຸນແກ່ຕົນເອງ ກາບໄຫວ້ຂໍພອນແລ້ວ
ພວກເຮົາກໍກັບເຂົ້າມາຕົວເມືອງຕໍ່ ເພື່ອເກັບເຄື່ອງອອກຈາກບ່ອນພັກ ແລ້ວພາກັນຂັບລົດອອກໄປເລາະຕະຫຼາດທ່າແຂກ ເພື່ອຊື້ຫາເຄື່ອງຝາກຂອງຕ້ອນ ມີຫຼາຍໆຢ່າງໜ້າສົນໃຈ ໂດຍສະເພາະພວກແນວຢູ່ແນວກິນ ເຊັ່ນ: ປູປານານ້ຳຕະຫຼາດທີ່ນີ້ອຸດົມສົມບູນຫຼາຍ ແຕ່ເຮົາຍັງຕ້ອງໄດ້ເດີນທາງອີກ ຈຶ່ງຂໍຊື້ແຕ່ພວກທີ່ເປັນເຄື່ອງຕ້ອນທີ່ໃຜມາທ່າແຂກຕ້ອງຊື້ກັບເມືອຄື:ເຂົ້າໜົມປ່ານ ແລະໜັງເຄັມ … ຂີ່ລົດຈັກອອກໄປໜ້ອຍໜຶ່ງຈາກຕົວເມືອງ ເພື່ອໄປເບິ່ງວິວຫຼັກລ້ານ ທີ່ບໍ່ໄດ້ຫ່າງຈາກຕົວເມືອງຫຼາຍ ກໍຄືພູຫີນປູນທີ່ສະຫຼັບຊັບຊ້ອນ ຕາມສອງຂ້າງທາງ ພູຜາປ່າໄມ້ທີ່ຍັງຄົງອຸດົມສົມບູນຫຼາຍໃນແຂວງຄຳມ່ວນ ຫຼັງຈາກຊື່ນຊົມຄວາມງາມຂອງທຳມະຊາດ ຖ່າຍຮູບເຕັມອີ່ມແລ້ວກໍເຖິງເວລາກັບວຽງຈັນ
ການເດີນທາງຄັ້ງນີ້ ຖືວ່າເປັນການເດີນທາງສັ້ນໆ 2 ມື້ 1 ຄືນ ທີ່ແລກກັບຄວາມສະຫງົບ ໄດ້ທ່ອງທ່ຽວແບບສ່ວນໂຕແບບນີ້ ຖືວ່າມັນຄຸ້ມຄ່າຫຼາຍ ທີ່ໄດ້ອອກມາເຫັນໃນບ່ອນທີ່ເຮົາບໍ່ຄຸ້ນເຄີຍ ແລະໄດ້ເປີດອີກຫຼາຍໆປະສົບການໃໝ່ໆໃຫ້ກັບຕົນເອງ ຝາກໄວ້ກ່ອນເມືອງທ່າແຂກ ແລ້ວຈະກັບມາສູດອາກາດດີໆ ດີທ໊ອກຮ່າງກາຍ ແລະຈິດໃຈແບບນີ້ໃຫມ່ ຈະກັບເກັບໃຫ້ມັນຄົບທຸກສະຖານທ່ອງທ່ຽວຂອງເມືອງແຫ່ງນີ້ເລີຍ ແລ້ວພົບກັນໃໝ່ ທ່າແຂກເມືອງແຫຼ່ງມົນສະເໜ່ .
ບົດຄວາມ: ວາລະສານ ຂວັນໃຈ
ຮຽບຮຽງ: ຊະນີIndy
