ອາກາດຮ້ອນ ປົນພາຍຸເຂົ້າ ຮູ້ສຶກເບື່ອໆຢາກໄປທ່ຽວ ແຕ່ສິໃຫ້ອອກນອກປະເທດ ເປີດເບິ່ງບັນຊີພັດເປັນໄປໄດ້ຍາກ (555) ດຽວກ່ອນ!!! ບໍ່ຕ້ອງນ້ອຍໃຈໄປ ມີສະຖານທີ່ມາແນະນຳແຟນໆອີກແລ້ວ ແນະນຳຕ້ອງມາທີ່ນີ້ເລີຍ ເມືອງຈຳພອນ ແຂວງສະຫວັນນະເຂດ ເຊິ່ງມີບ່ອນທ່ອງທ່ຽວຫຼາກຫຼາຍບໍ່ວ່າຈະເປັນທາງທຳມະຊາດ ວັດທະນະທຳແລະ ປະຫວັດສາດແຖມຫ່າງຈາກຕົວເມືອງພຽງ 50km ເທົ່ານັ້ນ.
ເລີ່ມຕົ້ນອອກເດີນທາງຕາມສາຍທາງເລກທີ 9A ພໍຮອດຫຼັກ35 ລ້ຽວເຂົ້າໄປອີກປະມານ 20km ກໍ່ຮອດຝາຍສຸຍແລ້ວ “ສຸຍ” ເປັນນ້ຳຕົກມະໂນ ທີ່ຜູ້ຄົນອ້ອມແອ້ມບ້ານແລະອອກມາຈາກຕົວເມືອງໄກສອນວັນເສົາອາທິດມັກມາໂດດນ້ຳ ນອກນັ້ນຈະມີຕົ້ມຫອຍປັງ ແລະ ປີ້ງປາກົດ.. ຂາຍແຄມຝັ່ງສຸຍ ມີບ່ອນຈອດລົດສະດວກສະບາຍ
ຖ້າໃຜໄດ້ມີໂອກາດໄດ້ມາໂດດນ້ຳຢູ່ ສຸຍແຫ່ງນີ້ ແນະນຳໃຫ້ຂັບລົດຕໍ່ໄປອີກໜ້ອຍໜຶ່ງ ກໍ່ຮອດບ້ານດົງເມືອງ ຈະເຫັນລີງອູ້ມລູກ ອູ້ມຫຼານອອກມາຢືນຖ້າອາຫານນຳນັກທ່ອງທ່ຽວເຕັມໄປໝົດເລີຍ. ລີງຂ້ອນຂ້າງລື້ງຄົນ ແຕ່ລາວບໍ່ໃຫ້ຈັບເດີ້ ບໍລິເວນດົງລີງ ຈະມີຮ້ານຄ້າເຊິ່ງສ່ວນຫຼາຍກໍ່ຈະຂາຍອາຫານໃຫ້ລີງຫັ້ນແລະ ເປັນກ້ວຍ ຖົ່ວດິນ ແລະ ເຂົ້າໜົມ…
ອອກຈາກດົງລີງ ຂັບລົດຜ່ານທົ່ງນາໄປຕໍ່ອີກຈັກໜ້ອຍກໍ່ຈະຮອດ ບ້ານໜອງລຳຈັນ ໃນບ້ານຈະມີວັດເຊິ່ງພາຍໃນວັດຈະມີຫໍພະໄຕປີດົກ ຫຼືຫໍໄຕ ຕັ້ງຢູ່ກາງໜອງນ້ຳ ມີອາຍຸກວ່າ 400ປີແລ້ວ. ເປັນບ່ອນທີ່ລວບລວມ ແລະ ເກັບຮັກສາໜັງສືໃບລານອັນເກົ່າແກ່. ສາເຫດທີ່ຕັ້ງໄວ້ກາງນ້ຳເພາະວ່າ ບໍ່ໃຫ້ໜູ, ແມງໄມ້… ເຂົ້າໄປກັດໜັງສືໃບລານໄດ້ ວັດນີ້ທຸກຄົນຕ້ອງປົດເກີບໄວ້ນອກວັດເດີ້ ສ່ວນຜູ້ຍິງນຸ່ງສົ້ງໄດ້ເດີ້ ແຕ່ຖ້າຢາກເຂົ້າຫໍໄຕຕ້ອງໄປບູຊາສິ້ນເດີ້ (ທີ່ຈິງກໍ່ຄວນຈະໃສ່ສິ້ນທຸກຄັ້ງທີ່ເຂົ້າວັດເນາະ ເພື່ອເປັນການໃຫ້ກຽດສະຖານທີ່) ບູຊາຄ່າເຂົ້າຫໍໄຕຄົນລະ5,000ກີບ ແລະໃນບໍລິວັດກໍມີສາລະໃຫ້ເຮົາສາມາດຍ່າງຂ້າມໄປອີກຝັ່ງໜຶ່ງເຊິ່ງກໍ່ຈະມີການໃຫ້ອາຫານປານັ່ງພັກຜ່ອນແລະມີພະອົງໃຫຍ່ໄວ້ໃຫ້ພວກເຮົາກາບໄຫວ້ອີກຝາກໜຶ່ງຂອງໜອງ
ຫຼັງຈາກນັ້ນເຮົາກໍ່ອອກໄປຕໍ່ອີກສະຖານທີ່ໜຶ່ງທີ່ບໍ່ຄວນພາດນັ້ນກໍ່ຄື ວັດເກົ່າ ບ້ານຕະແຫຼວເຊິ່ງເປັນແຫຼ່ງທ່ອງທ່ຽວອີກສະຖານທີ່ໜຶ່ງທີ່ສຳຄັນຂອງເມືອງຈຳພອນ ທີ່ມີວັດທະນະທຳອັນເກົ່າແກ່ແລະຮ່ອງຮອຍຂອງເສີກສົງຄາມແຕ່ກ່ອນທີ່ສຳຄັນແຫ່ງໜື່ງທີ່ບໍ່ຄວນພາດເລີຍ.
ວິຖີຊີວິດທີ່ລຽບງ່າຍ ແລະ ສະຫງົບຂອງຊາວບ້ານຖ້ຳກາງ ສະຖານທີ່ທີ່ໜ້າສົນໃຈຫຼາຍໆບ່ອນໃຫ້ເຮົາໄດ້ມາທ່ຽວຊົມທີ່ນີ້ ຈໍາພອນເມືອງໜື່ງທີ່ໜ້າສົນໃຈບໍ່ດ້ອຍໜ້າເມືອງອື່ນໆ ຖ້າຫາກໃຜມີໂອກາດໄດ້ມາທ່ຽວ ແຂວງ ສະຫວັນນະເຂດ ກໍຢ່າລືມແວ່ອອກມາທ່ຽວທາງເມືອງຈຳພອນແນ່ເດີ ຮັບຮອງວ່າແຟນໆບໍ່ຜິດຫວັງແນ່ນອນ.
(ອ່ານຈົບແລ້ວ ບໍ່ລໍຖ້າຊ້າ ເກັບເຄື່ອງກຽມອອກເດີນທາງ ໄປໃຊ້ຊີວິດແບບ Slow life ກັນເທາະ!!!)
(ຂໍ້ມູນ: ວາລະສານ ຂວັນໃຈ)