ຊົມເຊີຍ! ກອງປະຊຸມພົບປະນັກທຸລະກິດແມ່ຍິງລາວທົ່ວປະເທດ  “ກອງປະຊຸມສ້າງແຮງຈູງໃຈ ໃນການດຳເນີນທຸລະກິດຂອງແມ່ຍິງລາວ ເພື່ອກ້າວໃຫ້ທັນຍຸກ Digital ແລະ ບໍ່ຖິ້ມຜູ້ໃດໄວ້ຂ້າງຫຼັງ”

ນະຄອນຫຼວງວຽງຈັນ, ຕອນເຊົ້າຂອງ ວັນທີ 26 ກໍລະກົດ 2019 ໄດ້ມີພິທີໄຂ “ກອງປະຊຸມສ້າງແຮງຈູງໃຈ ໃນການດຳເນີນທຸລະກິດຂອງແມ່ຍິງລາວ ເພື່ອກ້າວໃຫ້ທັນຍຸກດິຈິຕອລ (Digital) ແລະ ບໍ່ຖິ້ມຜູ້ໃດໄວ້ຂ້າງຫຼັງ” ຈັດຂຶ້ນໂດຍ ສະມາຄົມນັກທຸລະກິດແມ່ຍິງລາວ ໃຫ້ກຽດເປັນປະທານໂດຍ ທ່ານ ນາງ ຈັນທະຈອນ ວົງໄຊ, ປະທານສະມາຄົມນັກທຸລະກິດແມ່ຍິງລາວ, ພ້ອມດ້ວຍແຂກກິດຕິມະສັກ, ຄະນະປະທານສະມາຄົມນັກທຸລະກິດແມ່ຍິງລາວ, ສະມາຊິກ ສທຍລ ,ບັນດາຜູ້ປະກອບການ ແລະ ສື່ມວນຊົນຫຼາຍຂະແໜງການກໍໄດ້ເຂົ້າຮ່ວມໃນງານນີ້ຢ່າງໜາແໝ້ນ.

ຈຸດປະສົງການຈັດກອງປະຊຸມ “ສ້າງແຮງຈູງໃຈໃນການດຳເນີນທຸລະກິດຂອງແມ່ຍິງລາວ ເພື່ອກ້າວໃຫ້ທັນຍຸກດິຈິຕອລ (Digital) ແລະ ບໍ່ຖິ້ມຜູ້ໃດໄວ້ຂ້າງຫຼັງ” ແມ່ນຖືເປັນກອງປະຊຸມຄັ້ງພິເສດ ແລະ ມີຄວາມໝາຍຄວາມສຳຄັນ ເພາະໄດ້ເປີດຂຶ້ນໃນທ່າມກາງທີ່ທົ່ວພັກ ທົ່ວລັດ  ແລະ ສັງຄົມລາວກຳລັງພ້ອມກັນຈັດຕັ້ງປະຕິບັດແນວທາງນະໂຍບາຍເສດຖະກິດໃໝ່ ໂດຍສະເພາະການນຳໃຊ້ເຕັກໂນໂລຊີ ດີຈິຕອສ ໃນຍຸກອຸສາຫະກຳ 4.0, ດັ່ງນັ້ນ ກອງປະຊຸມໃນຄັ້ງນີ້ ຖືເປັນຄັ້ງທຳອິດທີ່ທາງ ສະມາຄົມນັກທຸລະກິດແມ່ຍິງລາວ ໄດ້ເຊີນບັນດາຄະນະ ແລະ ສະມາຊິກ ສທຍລ ແລະ ຜູ້ປະກອບການແມ່ຍິງຈາກໃນຂອບເຂດທົ່ວປະເທດເຂົ້າຮ່ວມ ມີການຮຽນເຊີນການນຳທີ່ເປັນເພດຍິງຈາກບັນດາກະຊວງ, ອົງການຂອງບັນດາພາກລັດເຂົ້າມາຮ່ວມຮັບຟັງ ຜົນງານການເຄື່ອນໄຫວຂອງຄະນະ ໃນການຂະຫຍາຍ ແລະ ພັດທະນາທຸລະກິດ ພ້ອມທັງການຮ່ວມມືເຂົ້າໃນການຊ່ວຍເຫຼືອສັງຄົມໃນໄລຍະ 6 ເດືອນຂອງຕົ້ນປີ 2019 ທີ່ຜ່ານມາ

ພາຍໃນກອງປະຊຸມໄດ້ມີການສຳມະນາໃນຫຼາກຫຼາຍຫົວຂໍ້ເຊັ່ນ: ພາກເຊົ້າໄດ້ມີການສຳມະນາກ່ຽວກັບການແລກປ່ຽນບົດຮຽນເຊິ່ງກັນແລະກັນກ່ຽວກັບການກະກຽມເພື່ອຮອງຮັບການປ່ຽນແປງໃນການດຳເນີນທຸລະກິດຕາມຍຸກ 4,0 ຈາກບັນດາຫົວໜ່ວຍ Start up ກໍຄືນັກທຸລະກິດໜຸ່ມນ້ອຍທີ່ມີຫົວທັນສະໄໝ ສາມາດນຳເຕັກໂນໂລຊີມານຳໃຊ້ໃນທຸລະກິດ, ໃນຕອນບ່າຍມີການຮັບຟັງການສົນທະນາຈາກຜູ້ມີປະສົບການ ແລະ ປະສົບຜົນສຳເລັດໃນດ້ານຂອງທຸລະກິດເຊິ່ງມີ 3 ຫົວຂໍ້ໃຫ່ຍດັ່ງນີ້:

• ການແກ້ໄຂວິກິດການໃນການດຳເນີນທຸລະກິດ ຈາກ ທ່ານ ກິດສະໝາ ວົງໄຊ ປະທານຜູ້ບໍລິຫານບໍລິສັດເບຍລາວ
• ການສ້າງແຮງຈູງໃຈໃນການດຳເນີນທຸລະກິດຂອງແມ່ຍິງ ຈາກ ທ່ານ ນາງ ປານິຕາ ເທບການຈະນາ ຮອງປະທານ (AWEN) 
• ການເຂົ້າຫາແຫຼ່ງທຶນ ຈາກ ທ່ານ ພູໂຂງ ຈັນທະຈັກ ປະທານສະມາຄົມທະນາຄານລາວ ທັງເປັນຜູ້ອຳນວຍການທະນາຄານການຕ່າງປະເທດລາວມະຫາຊົນ

ແລະ ນອກຈາກນັ້ນບັນດາແຂກທີ່ຮ່ວມງານຍັງໄດ້ຮັບຟັງການໃຫ້ກຽດໂອ້ລົມ ຂອງ ພະນະທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ອີກດ້ວຍ.

ສຳລັບ ສະມາຄົມນັກທຸລະກິດແມ່ຍິງລາວ ເປັນອົງກອນທີ່ບໍ່ຫວັງຜົນກຳໄລ ມີຈຸດປະສົງໃນການສ້າງຕັ້ງກໍຄືເພື່ອສືບຕໍ່ຊຸກຍູ້ ສົ່ງເສີມ ເອື້ອອຳນວຍຄວາມສະດວກໃຫ້ສະມາຊິກ ແລະ ຜູ້ປະກອບການແມ່ຍິງລາວທັງໝົດໃນຂອບເຂດທົ່ວປະເທດ ເພື່ອໃຫ້ໄດ້ດຳເນີນທຸລະກິດຢ່າງສະດວກ ແລະ ງ່າຍຂຶ້ນ, ບົນພື້ນຖານແນວທາງນະໂຍບາຍຂອງພັກລັດ ແລະ ລະບຽບກົດໝາຍຂອງລັດ.

(ຂ່າວທີ່ກ່ຽວຂ້ອງກ່ອນໜ້າ)

(ແມ່ຍິງລາວເກັ່ງຫຼາຍ) ຊົມເຊີຍ! ນັກທຸລະກິດແມ່ຍິງລາວໄດ້ຮັບລາງວັນດີເດັ່ນລະດັບອາຊຽນ #ແຊຣໄປໃຫ້ໂລກຮູ້