ຮູ້ ຫຼືບໍ່ວ່າ Laurene Powell Jobs ພັນລະຍາຂອງ STEVE JOBS ເປັນແມ່ຍິງທີ່ເກັ່ງ ແລະ ລວຍທີ່ສຸດໃນໂລກອັນດັບທີ 8 ເຊິ່ງສ່ວນໜື່ງຂອງຄວາມລວຍແມ່ນມາຈາກມໍລະດົກຕົກຫຸ້ນ Apple ແລະ Disney ຈາກສາມີທີ່ລ່ວງລັບໄປແລ້ວນັ້ນກໍຄື Steve Jobs ວິລະບູລຸດແຫ່ງວົງການໄອທີໂລກ… ຫຼາຍຄົນອາດເບິ່ງວ່າແມ່ຍິງຄົນນີ້ໂຊກດີທີ່ໄດ້ແຕ່ງດອງຮ່ວມໃຊ້ຊີວິດຄູ່ກັບ Steve Jobs ເພາະຄົນທົ່ວໂລກຕ່າງກໍພາກັນຍ້ອງວ່າ Steve Jobs ສາມາດປ່ຽນໂລກດ້ວຍນະວັດຕະກຳ ຕັ້ງແຕ່ iPod iPhone ແລະ iPad
ແລ້ວເລື່ອງລາວຂອງ Laurene Powell Jobs ນ່າສົນໃຈແບບໃດ? ມື້ນີ້ຂວັນໃຈຈະມາເລົ່າໃຫ້ຟັງ…
ນາງ Laurene Powell Jobs ເກີດຢູ່ທີ່ລັດ ນິວເຈຊີ ປະເທດສະຫະລັດອາເມລິກາ ປະຫວັດຂອງແມ່ຍິງຄົນນີ້ບໍ່ຄ່ອຍເປັນທີ່ຮູ້ຈັກກັນຫຼາຍປານໃດເພາະວ່າ Laurene Powell ບໍ່ຄ່ອຍໃຫ້ສໍາພາດກັບສື່ຕ່າງໆ ລວມໄປເຖິງຕອນທີ່ Steve Jobs ຍັງມີຊີວິດຢູ່ ລາວເປັນຄົນທີ່ມັກໃຫ້ຄວາມສໍາຄັນກັບເລື່ອງເປັນສ່ວນຕົວຂອງຄອບຄົວ ຈື່ງເຮັດໃຫ້ຍາກທີ່ຈະເຫັນຮູບຄູ່ຂອງທັ້ງສອງຕາມທີ່ສາທາລະນະຕ່າງໆ
ເທົ່າທີ່ມີຂໍ້ມູນ Laurene Powell ຈົບການສຶກສາ ລະດັບປະລິນຍາຕີດ້ານລັດຖະສາດ ແລະ ເສດຖະສາດ ຈາກມະຫາວິທະຍາໄລ ເພນຊິລເວເນຍ ຫຼັງຈາກທີ່ຮຽນຈົບລາວກໍເລີ່ມເຮັດວຽກກ່ຽວກັບສາຍການເງິນ ແລະ ສະຖາບັນຊື່ດັງ Merrill Lynch ແລະ Goldman Sachs ຕໍ່ມາລາວຈື່ງຕັດສິນໃຈຮຽນຕໍ່ MBA ທີ່ມະຫາວິທະຍາໄລ ສະແຕນຟອດ ເຊິ່ງເລື່ອງນີ້ເອງທີ່ເປັນຈຸດເລີ່ມຕົ້ນໃຫ້ລາວ ແລະ Steve Jobs ໄດ້ພົບກັນ
ໃນປີ 1987 Steve Jobs ໄດ້ຖືກຮັບເຊີນມາບັນຍາຍຢູ່ທີ່ມະຫາວິທະຍາໄລ ສະແຕນຟອດ ຕອນນັ້ນ Steve Jobs ໄດ້ຖືກໄລ່ອອກຈາກ Apple ແລະ ກໍລັງກໍ່ຕັ້ງບໍລິສັດໃໝ່ທີ່ຊື່ວ່າ NeXT ແລ້ວໂຊກສະຕາຂອງ Laurene Powell ກໍໄດ້ເລີ່ມຂຶ້ນຕອນນີ້… ເຖິງວ່າຕອນນັ້ນ Laurene Powell ຈະບໍ່ໄດ້ຮັບຄວາມສົນໃຈຈາກການບັນຍາຍ ແລະ ລາວຍັງຄິດວ່າ Steve Jobs ເປັນ Bill Gates ເພາະວ່າເຊີນຊວນຈາກໝູ່ ລາວຈື່ງໄປຟັງບັນຍາຍໃນມື້ນັ້ນ
ໃນມື້ນັ້ນ Laurene Powell ແລະ ໝູ່ຂອງລາວຍັງເຂົ້າຫ້ອງຊ້າ ຈື່ງຈໍາຕ້ອງໄດ້ໄປນັ່ງບໍລິເວນທີ່ຖືກກັນໄວ້ສໍາຫຼັບແຂກຄົນພິເສດ ແລະ ໜື່ງໃນນັ້ນກໍຄື Steve Jobs ເຊິ່ງກາຍມາເປັນຄົນທີ່ນັ່ງຂ້າງໆ Laurene Powell
ລະຫວ່າງທີ່ Steve Jobs ລໍຖ້າຂຶ້ນບັນຍາຍ ທັງສອງມີໂອກາດໄດ້ລົມກັນ Laurene Powell ໄດ້ຕົວະວ່າລາວຈັບສະຫຼາກໄດ້ທີ່ນັ່ງບ່ອນນີ້ ແລະ ລາງວັນຂອງການສ່ຽງໂຊກນີ້ຍັງ ມີໂອກາດຮ່ວມກິນອາຫານກັບຜູ້ບັນຍາຍນໍາອີກ! ຫຼັງຈາກຈົບບັນຍາຍເທິງເວທີ Steve Jobs ກໍໄດ້ຖາມ Laurene Powell ວ່າຈະໄປກິນເຂົ້າກັບລາວບໍ່… ແລະ ຈາກນັ້ນປະມານ 4 ປີ ທັ້ງສອງກໍໄດ້ແຕ່ງງານກັນ ໂດຍມີລູກທັງໝົດ 3 ຄົນ
ຫຼັງຈາກທີ່ Steve Jobs ເສຍຊີວິດຈາກພະຍາດມະເຮັງຕັບອ່ອນໃນປີ 2011 ນອກຈາກຫຸ້ນມູນຄ່າມະຫາສານຂອງ Apple ແລະ Disney ທີ່ເຮັດໃຫ້ Laurene Powell ແລະ ລູກຂອງລາວ ກາຍເປັນເສດຖີແລ້ວ Steve Jobs ຍັງເປັນບຸກຄົນທີ່ມີິອິດທິພົນຫຼາຍໃນຊີວິດຂອງ Laurene Powell ນໍາອີກ
ໜື່ງເລື່ອງທີ່ Laurene Powell ໄດ້ຮຽນຮູ້ຈາກສາມີລາວກໍຄື ການບໍ່ຍອມຮັບວ່າໂລກ ເປັນສິ່ງທີ່ປ່ຽນແປງບໍ່ໄດ້ ລາວເຊື່ອວ່າ ຄົນເຮົາມີສັກກາຍະພາບທີ່ຈະປ່ຽນແປງໂລກໄດ້ ເຊິ່ງຕອນນີ້ Laurene Powell ກໍາລັງໃຫ້ຄວາມສໍາຄັນກັບການກຸສົນ ການບໍລິຈາກເງິນ ແລະ ສ້າງໂຄງການຊ່ວຍເຫຼືອສັງຄົມ! ລາວເຄີຍສໍາພາດວ່າ ຕ້ອງການໃຊ້ຄວາມຮູ້ ແລະ ເຄືອຂ່າຍຄວາມສໍາພັນທີ່ມີຢູ່ໃນການສ້າງປະໂຫຍດໃຫ້ໄດ້ຫຼາຍທີ່ສຸດ
ໃນປີ 1997 ລາວໄດ້ກໍ່ຕັ້ງ College Track ອົງການບໍ່ສະແຫວງຫາຜົນກຳໄລ ທີ່ພ້ອມກຽມຄວາມຮູ້ສູ່ມະຫາວິທະຍາໄລ ໃຫ້ກັບເດັກນ້ອຍທີ່ມີລາຍໄດ້ໜ້ອຍ
ໃນປີ 2004 ລາວໄດ້ກໍ່ຕັ້ງ Emerson Collective ແຕ່ບໍ່ແມ່ນອົງກອນການກຸສົນທົ່ວໄປ ແຕ່ປຽບດັ່ງກັບກອງທຶນທີ່ລົງທຶນໃຫ້ກັບ Start Up ໂດຍໃຫ້ຄວາມສໍາຄັນກັບເລື່ອງອົບພະຍົບ ຄວາມເທົ່າທຽມກັນໃນສັງຄົມ ແລະ ການສຶກສາ
ນອກຈາກນັ້ນລາວຍັງນັ່ງຢູ່ໃນຄະນະກຳມະການຂອງອົງກອນເພື່ອສັງຄົມອີກຫຼາຍແຫ່ງ… Laurene Powell ຍັງກ່າວອີກວ່າ ລາວໄດ້ຮັບຄວາມຮັ່ງມີຈາກສາມີ ແລະ ເບິ່ງຄືວ່າ ສາມີຂອງລາວກໍບໍ່ຄ່ອຍໄດ້ສົນໃຈກັບການຈັດການເລື່ອງເງິນທອງພໍປານໃດ ລາວຈື່ງຕັດສິນໃຈຈະຈັດສັນມັນໃຫ້ມີປະສິດທະພາບຫຼາຍທີ່ສຸດ ເພື່ອຊ່ວຍເຫຼືອສັງຄົມໃຫ້ມີຄວາມໝັ້ນຄົງ ແລະ ຢືນຍາວ…
ແຫຼ່ງຂໍ້ມູນ:
–https://www.forbes.com/profile/laurene-powell-jobs/…
–https://www.cnbc.com/…/lesson-steve-jobs-shared-with-wife-l…
–https://www.businessinsider.com/laurene-powell-jobs-childre…
–https://www.businessinsider.com/laurene-powell-jobs-net-wor…