ຂ່າວດີສໍາລັບສາວໆ ຫຼື ນັກທຸລະກິດທ່ານໃດທີ່ຕ້ອງການຢາກເປັນຕົວແທນຂາຍສິນຄ້າຈາກຍີ່ປຸ່ນ ອົງການສົ່ງເສີມການຄ້າຍີ່ປຸ່ນ ປະຈໍາ ສປປ ລາວ ຫຼື ອົງການ JETRO VIENTIANE ໄດ້ຈັດງານວາງສະແດງສິນຄ້າຈາກປະເທດຍີ່ປຸ່ນ ຫຼື “Japan Product Exhibition 2021” ເປັນທາງການໃນວັນທີ 03 ກຸມພາ 2021 ທີ່ໂຮງແຮມ ຄຣາວພລາຊ່າ, ພາຍໃນງານມີສິນຄ້າຫຼາຍເຖິງ 82 ລາຍການ ຈາກ 28 ບໍລິສັດ, ໃນນັ້ນມີສິນຄ້າປະເພດອາຫານ ເຊັ່ນ: ພາສຕ້າ ທີ່ເຮັດຈາກເຂົ້າ, ສາຫລ່າຍຍີ່ປຸ່ນ, ໃບຊາຍີ່ປຸ່ນ…. ສິນຄ້າປະເພດເຄື່ອງສໍາອາງ ເຊັ່ນ: ຄີມທາຝ້າ, ໂລຊັນ, ຢາຟື້ນຟູເສັ້ນຜົມ ແລະ ນໍ້າຢາຍ້ອມຜົມ, ນອກຈາກນີ້ ຍັງມີສິນຄ້າປະເພດອາຫານເສີມ ເຊັ່ນ ຄໍລະເຈັນ, ເມັດຈຸລິນຊີທີ່ດີຕໍ່ລໍາໄສ້ ແລະ ອື່ນໆ.

ທ່ານ ຄາຊຶອິຈິ ອິວະຄະມິ ຫົວໜ້າອົງການສົ່ງເສີມການຄ້າຍີ່ປຸ່ນ ປະຈໍາ ສປປ ລາວໄດ້ກ່າວວ່າ: ການອົງການດັ່ງກ່າວ ເປັນອົງການໜຶ່ງຂອງລັດຖະບານຍີ່ປຸ່ນທີ່ຂຶ້ນກັບກະຊວງເສດຖະກິດ, ການຄ້າ ແລະ ອຸດສາຫະກໍາຍີ່ປຸ່ນ ເຊິ່ງມີ 3 ພາລະບົດບາດຫຼັກທີ່ສໍາຄັນຄື: ສົ່ງເສີມການລົງທຶນຈາກຍີ່ປຸ່ນເຂົ້າໃນລາວ, ນໍາສິນຄ້າຍີ່ປຸ່ນມາໂປຣໂມດຢູ່ລາວ ແລະ ສ້າງໂອກາດໃຫ້ນັກລົງທຶນຂະແໜງກະສິກໍາຂອງທັງສອງປະເທດໄດ້ພົບປະໂອ້ລົມທຸລະກິດຮ່ວມກັນ.

ງານວາງສະແດງສິນຄ້າຍີ່ປຸ່ນນີ້ໄດ້ຖືກຈັດຂຶ້ນເປັນຄັ້ງທີ 5 ແລ້ວ, ຈຸດປະສົງຂອງງານ ແມ່ນເພື່ອເປັນການແນະນໍາສິນຄ້າຍີ່ປຸ່ນໃນລາວ ຢາກໃຫ້ມີຕົວແທນຂາຍສິນຄ້າຍີ່ປຸ່ນໃນລາວເພີ່ມຂຶ້ນ ພ້ອມທັງຢາກໃຫ້ບັນດານັກທຸລະກິດລາວໄດ້ເຂົ້າເຖິງຜະລິດຕະພັນຍີ່ປຸ່ນໃຫ້ຫຼາຍຂຶ້ນ ເຊິ່ງຈະຊ່ວຍສົ່ງເສີມທຸລະກິດໃນລາວໃຫ້ມີການຂະຫຍາຍຕົວ


ນັກທຸລະກິດລາວທ່ານໃດທີ່ສົນໃຈຢາກຂາຍສິນຄ້າຍີ່ປຸ່ນ ສາມາດໄປເບິ່ງ ແລະ ສໍາພັດຄຸນນະພາບຂອງສິນຄ້າແຕ່ລະຢ່າງໄດ້ ຢູ່ທີ່ຫ້ອງການ ຂອງອົງການສົ່ງເສີມການຄ້າຍີ່ປຸ່ນ ປະຈໍາລາວ ທີ່ອາຄານວຽງວັງ ຊັ້ນ 4 ຖະໜົນບູລີຈັນ, ບ້ານດົງປ່າລານທົ່ງ ເມືອງສີສັດຕະນາກ ນະຄອນຫຼວງວຽງຈັນ ນັບແຕ່ວັນທີ 5 ກຸມພາ ຫາ ວັນທີ 26 ກຸມພາ 2021, ເວລາ 9:00 – 17:00 ໂມງ (ຍົກເວັ້ນ ວັນເສົາ ແລະ ວັນອາທິດ)
ຂໍ້ມູນເພີ່ມຕື່ມ ສາມາດເຂົ້າເບິ່ງໄດ້ໃນລິ້ງນີ້:https://my.ebook5.net/JETROVientiane/JPE2021/














