ເນື່ອງໃນໂອກາດວັນແມ່ຍິງສາກົນ 8 ເດືອນມີນາ 2017 ທາງໂຮງໝໍມະໂຫສົດ ຮ່ວມກັບສະມາຄົມມະເຮັງເຕົ້ານົມລາວ (ABCD) ຈະໄດ້ຈັດກິດຈະກຳມອບຂອງຂວັນ ໃຫ້ແມ່ຍິງລາວທົ່ວປະເທດ ໂດຍການກວດຊອກຫາເຊື້ອມະເຮັງເຕົ້ານົມ ຂັ້ນເລີ່ມຕົ້ນ ສຳຫຼັບແມ່ຍິງໂດຍບໍ່ເສຍຄ່າໃຊ້ຈ່າຍໃດໆ ເຊິ່ງຈະຈັດຂຶ້ນໃນວັນທີ 4 ມີນາ 2017 ກົງກັບວັນເສົາ ເວລາ10:00 -15:00 ໂມງ ຢູ່ໂຮງໝໍມະໂຫສົດ ນະຄອນຫຼວງວຽງຈັນ.
ສະນັ້ນ, ຈຶ່ງເຊີນຊວນແມ່ຍິງລາວບັນດາເຜົ່າ ໃນຂອບເຂດທົ່ວປະເທດ ເຂົ້າມາກວດຊອກຫາເຊື້ອມະເຮັງເຕົ້ານົມ ເນື່ອງຈາກວ່າເຊື້ອມະເຮັງ ຖ້າບໍ່ໄດ້ຮັບການປິ່ນປົວແຕ່ເລີ່ມຕົ້ນ ອາດເຮັດໃຫ້ເກີດຜົນເສຍຫາຍແກ່ຊີວິດໄດ້, ເຊື້ອມະເຮັງບໍ່ພຽງຈະເກີດກັບຄົນທີ່ມີອາຍຸຫຼາຍເທົ່ານັ້ນ ແຕ່ຄົນຢູ່ໃນໄລຍະຈະເລີນພັນ ກໍມີຄວາມສ່ຽງເປັນມະເຮັງໄດ້ ໂດຍສະເພາະມະເຮັງເຕົ້ານົມ. ສຳລັບຄວາມສ່ຽງທີ່ເຮັດໃຫ້ເກີດມະເຮັງເຕົ້ານົມ ມີຫຼາຍປັດໄຈ ເປັນຕົ້ນ ການມີປະຈຳເດືອນຄັ້ງທຳອິດເມືອອາຍຸຍັງນ້ອຍ, ການໝົດປະຈຳເດືອນຊ້າ, ບໍ່ມີລູກ, ມີລູກຄົນທີ 1 ຕອນອາຍຸກາຍ 30 ປີ ແລະ ຍັງລວມເຖິງຄົນໃນຄອບຄົວ ທີ່ມີປະຫວັດເນື້ອເຫຍື້ອເຕົ້ານົມຜິດປົກກະຕິ ຫຼື ຄົນໃນຄອບຄົວ ທີ່ມີສາຍເລືອດດຽວກັນ ເຄີຍເປັນມະເຮັງເຕົ້ານົມມາກ່ອນ.
ຢ່າງໃດກໍຕາມ ແມ່ຍິງທຸກຄົນຄວນມີຄວາມລະມັດລະວັງ ໃນເລື່ອງອາຫານການກິນ ໂດຍສະເພາະ ອາຫານທີ່ມີໄຂມັນສູງ ຫຼື ການດື່ມເຫຼົ້າ ຈະເປັນການເປີດທາງໃຫ້ມະເຮັງ ກໍ່ໂຕໄດ້ງ່າຍ. ສ່ວນວິທີປ້ອງກັນມະເຮັງ ຄວນຮູ້ຈັກຄວບຄຸມນ້ຳໜັກ, ບໍ່ຄວນສູບຢາ, ຫຼຸດຜ່ອນເຄື່ອງດື່ມທີ່ມີທາດເຫຼົ້າ, ໝັ່ນອອກກຳລັງກາຍ ແລະ ຫຼີກເວັ້ນການຖືກລັງສີບໍລິເວນໜ້າ ແລະ ອື່ນໆ.
ແຫຼ່ງຂ່າວ: ຂ່າວສານປະເທດລາວ. ຂ່າວ: ທະນູທອງ