ໂຄງການບ້ານມິດຕະພາບ ຊາວໜຸ່ມຊາຍແດນ ລາວ-ຫວຽດນາມ

ລັດຖະບານ ​ແຫ່ງ ສປປ ລາວ ​ແລະ ລັດຖະບານ ສສ ຫວຽດນາມ ​ໄດ້​ສ້າງໂຄງການບ້ານມິດຕະພາບ ຊາວໜຸ່ມຊາຍແດນ ລາວ-ຫວຽດນາມ ເຂດໜອງກອກ ຢູ່ທີ່ເມືອງຄຳເກີດ, ແຂວງ ບໍລິຄຳໄຊ ເພື່ອເປັນບ່ອນຝຶກອົບຮົມວິຊາຊີບ, ສ້າງວຽກເຮັດງານທຳໃຫ້ກັບຊາວໜຸ່ມ, ປະຊົນບັນດາເຜົ່າ ໃນບໍລິເວນໃກ້ຄຽງ ກໍຄື ການສົ່ງເສີມວຽກເຮັດງານທຳ ໃຫ້ຊາວໜຸ່ມລາວ ບັນດາເຜົ່າໃນ ຂອບເຂດທົ່ວປະເທດ. ​ໂຄງການດັ່ງກ່າວ ໄດ້​ເລີ່​ມກໍ່ສ້າງ​ຕັ້ງ​ແຕ່ເດືອນສິງຫາ ປີ 2012  ມາຮອດວັນທີ 9 ມີນາ 2017 ຈຶ່ງໄດ້ມີພິທີມອບ-ຮັບ  ​ແລະ ​ເລິ່ມຈັດ​ຕັ້ງ​ປະຕິບັດ ໂຄງການຢ່າງ​ເປັນ​ທາງ​ການ.

ໂຄງການດັ່ງກ່າວ ໄດ້ຮັບການຊ່ວຍເຫຼືອລ້າ ຈາກລັດຖະບານ ສສ ຫວຽດນາມ ລວມມູນຄ່າທັງໝົດ 75,2 ຕື້ດົ້ງ, ທຶນສົມທົບຂອງ ລັດຖະບານ ສປປ ລາວ 3 ຕື້ກີບ. ​ໂດຍນຳໃຊ້ເນື້ອ ທີ່ທັງໝົດ 1.034 ເຮັກຕາ ປະກອບມີການກໍ່ສ້າງພື້ນຖານ ໂຄງລ່າງເຊັ່ນ: ຫ້ອງປະຊຸມ, ຫ້ອງຝຶກອົບຮົມວິຊາຊີບ, ຫໍພັກນັກຝຶກອົບຮົມ, ສຸກສາລາ, ນ້ຳບາດານ, ໄຟຟ້າ, ເຮືອນພັກ ໃຫ້ປະຊາຊົນຄອບຄົວ ທຸກຍາກຂາດເຂີນ, ສວນສາທິດເຕັກນິກ ກະສິກຳປູກຝັງ-ລ້ຽງສັດ. ປະຈຸບັນໂຄງການໄດ້ນຳສັດລ້ຽງ ປະກອບສ່ວນໃຫ້ອີກເຊັ່ນ: ໝູ 100 ໂຕ, ໄກ່ພັນຊີ້ນ 200 ໂຕ, ງົວແນວພັນ 16 ໂຕ; ປູກພືດກິນໝາກເຊັ່ນ  ຕົ້ນໝາກລີ້ນຈີ່ 1,1 ເຮັກຕາ, ໝາກນັດ 3,41 ເຮັກຕາ. ສ່ວນ​ເນື້ອ​ທີ່​ທີ່​ເຫຼືອ​ແມ່ນ​ປູກ ພືດອຸດສະຫະກຳເຊັ່ນ ຢາງພາລາ, ມັນຕົ້ນ ແລະ ເປັນປ່າປ້ອງກັນ.

ແຫຼ່ງຂ່າວ: ຂ່າວສານປະເທດລາວ