ແມ່ຕູ້ທວດຊາວຍີ່ປຸ່ນຖືກບັນທຶກສະຖິຕິ ກາຍເປັນຜູ້ທີ່ມີອາຍຸຍືນຍາວທີ່ສຸດໃນໂລກ

ກິນເນສ ເວີ ເຣັກຂອດ (Guinness world records) ໄດ້ບັນທຶກສະຖິຕິທີ່ສຸດຂອງໂລກ ປະກາດໃຫ້ ແມ່ຕູ້ທວດ ຄາເນະ ທານາກະ ຈາກປະເທດ ຍີ່ປຸ່ນ ອາຍຸ 116 ປີ ເປັນຜູ້ທີ່ມີອາຍຸຍືນຍາວທີ່ສຸດໃນໂລກ ແລະ ຍັງຄົງມີຊີວິດຢູ່ ເຖິງແມ່ນວ່າ ແມ່ຕູ້ທວດ ຄາເນະ ຈະມີບັນຫາກ່ຽວກັບສຸຂະພາບ ແຕ່ເພິ່ນກໍມີຄວາມສຸກ ແລະມ່ວນກັບທຸກໆຊ່ວງຂອງຊີວິດ

ຄາເນະ ທານາກະ ເກີດວັນທີ 2 ມັງກອນ 1903 (ລວມອາຍຸ 116 ປີ) ຊຶ່ງເປັນປີດຽວທີ່ນັກຄົ້ນຄວ້າໄດ້ຄິດຄົ້ນເຮືອບິນລຳທຳອິດຂອງໂລກໄດ້ສຳເລັດ, ແມ່ຕູ້ທວດ ຄາເນະ ເປັນລູກຄົນທີ່ 7 ແລະ ມີບຸດ 5 ຄົນກັບສາມີທີ່ມີຊື່ວ່າ ຮິເດໂອະ ທານາກະ ເຊິ່ງກ່ອນວັນທີ່ຈະແຕ່ງງານທັງສອງບໍ່ເຄີຍເຫັນໜ້າ ແລະບໍ່ເຄີຍໄດ້ເວົ້າລົມກັນມາກ່ອນ, ສາມີຂອງເພິ່ນເປັນຜູ້ຜະລິດ ແລະ ເຮັດທຸລະກິດຂາຍເຂົ້າໜຽວ ເຂົ້າໜົມຍີ່ປຸ່ນ ແລະ ເສັ້ນອຸດົ້ງ

ພໍຮອດປີ 1937 ສາມີຂອງແມ່ຕູ້ທວດ ຄາເນະ ກໍໄດ້ຖືກເອີ້ນຕົວໃຫ້ໄປເປັນທະຫານຮັບໃຊ້ຊາດ ເພິ່ນຈຶ່ງໄດ້ມາເບິ່ງທຸລະກິດຂອງຄອບຄົວ ພ້ອມທັງຮັບໜ້າທີ່ແມ່ທີ່ຕ້ອງເບິ່ງແຍງລູກເຖິງ 5 ຄົນ

ນີ້ຄືເຄັດລັບອາຍຸຍືນຂອງ ແມ່ຕູ້ທວດ ຄາເນະ:

• ຕື່ນເຊົ້າ ເພິ່ນຕື່ນນອນ 6 ໂມງເຊົ້າທຸກໆມື້ ເພື່ອພ້ອມທີ່ຈະຮັບອາກາດບໍລິສຸດ ແລະ ເລີ່ມຕົ້ນວັນໃໝ່
• ພັດທະນາສະໝອງ ສິ່ງທີ່ເພິ່ນມັກເຮັດເປັນປະຈຳກໍຄື ການອ່ານ ແລະ ຮຽນວິຊາຄະນິດສາດ
• ເຮັດກິດຈະກຳຢູ່ສະເໝີ ເພິ່ນກາຍເປັນຜູ້ຊ່ຽວຊານການຫຼິ້ນບອດເກມຄາສສິກ ແລະ ເພິ່ນຍັງມັກຫຼິ້ນເກມກັບເຈົ້າໜ້າທີ່ໆເບິ່ງແຍງບ້ານພັກຄົນຊະລາ ເຊິ່ງເກມທີ່ມັກທີ່ສຸກກໍຄື ໂອເທວໂລ  (Othello)
• ກິນຊ໋ອກໂກແລັດ ແລະ ກິນກາເຟເປັນປະຈຳ ໃນມື້ທີ່ Guinness world records ມາເຮັດການບັນທຶກສະຖິຕິ ເພິ່ນກໍໄດ້ຮັບກ່ອງຊ໋ອກໂກແລັດເປັນຂອງຂວັນ ແລະ ກໍໄຂກິນທັນທີ

ແລະ ຄວາມລັບທີ່ສຳຄັນຂອງ ແມ່ຕູ້ທວດ ຄາເນະ ທີ່ເຮັດໃຫ້ອາຍຸຍືນຍາວກໍຄືເພິ່ນບໍ່ເຄີຍໝົດຫວັງບໍ່ວ່າຈະເກີດບັນຫາຫຍັງຂຶ້ນກໍຕາມ ຮູ້ຈັກໃຊ້ຊີວິດໃຫ້ມີຄວາມສຸກກັບບັນຫາທີ່ເກີດຂຶ້ນ ແລະ ເພິ່ນຍັງບອກອີກວ່າ…ເພິ່ນຢາກຈະມີຊີວິດໄປຈົນເຖິງອາຍຸ 120 ປີ.

ທີ່ມາ https://brightside.me/