ເປັນອີກຂ່າວທີ່ເສົ້າສະຫຼົດໃຈແຕ່ເຊົ້າ ເພາະຕື່ນຂຶ້ນມາກໍພົບຂ່າວທີ່ເສົ້າໂສກເສຍໃຈ ໄວ້ອາໄລເຖິງອາດີດ ພິທີກອນ, ນາງແບບ, ນາງງາມ ແລະ MC ສາວ ແອັບເປິ່ນ ສຸດາລັດ ຄູນມາລາ ທີ່ໄດ້ຈາກພວກເຮົາໄປໂດຍບໍ່ມີວັນຫວນຄືນມາ ຂອງບັນດາໝູ່ເພື່ອນ ຄົນສະໜິດຂອງສາວແອັບເປິ່ນ ໂດຍສະເພາະ ອ້າຍຕຸ້ຍ ໂອເວີ້ ແດ້ນສ ທີ່ໄດ້ໂພສຜ່ານ Face book ສ່ວນຕົວ Touy Overdance ເປັນການໄວ້ອາໄລແກ່ ໝູ່ສະນິດທີ່ເຄີຍເຮັດວຽກໃນວົງການທັນເທິງນໍາກັນມາດົນວ່າ “ເສຍໃຈທີ່ໄດ້ຍີນຂ່າວແບບກະທັນຫັນ ? ແຕ່ຕ້ອງຍອມຮັບ ເພາະມັນເຖິງເວລາທີ່ນາງຟ້າຕ້ອງກັບສະຫວັນແລ້ວ…RIP Apple Khounmala “ພວກເຮົາຈົ່ງຮັກແພງກັນໄວ້ ຕອນທີ່ຍັງມີຊີວີດຢູ່ ເພາະຊີວິດຄົນເຮົາມັນແສນສັ້ນ…ຈາກກັນມື້ໃດກໍ່ບໍ່ຮູ້” ອ້າຍTar Bannokໄດ້ກ່າວໄວ້ ;(” ຫຼັງຈາກນັ້ນກໍໄດ້ມີໝູ່ເພື່ອນໃນວົງການ ພ້ອມດ້ວຍແຟນຄຣັບເຂົ້າໄປສະແດງຄວາມເສຍໃຈກັບການຈາກໄປຂອງ ສາວແອັບເປິ່ນ ເປັນຈໍານວນຫຼວງຫຼາຍ…
ເຊິ່ງສາເຫດການເສຍຊີວິດຂອງ ສາວແອັບເປິ່ນ ໃນຄັ້ງນີ້ ແມ່ນຄາດວ່າອາດຈະເກີດຈາກ ອາການພູມແພ້ (ຕິດເຊື້ອໃນກະແສເລືອດ) ທີ່ຫາກໍເກີດຂຶ້ນກັບສາວແອັບເປິ່ນເມື່ອບໍ່ດົນມານີ້ ແລະ ມື້ວານນີ້ເອງ (ມື້ທີ່ນາງເສຍຊີວິດ) ຕອນເຊົ້າອາການກໍຍັງປົກກະຕິ ຍັງສາມາດໄປເຮັດວຽກໄດ້ ແຕ່ຫຼັງຈາກນັ້ນກໍເກີດມີອາການຊ໊ອກໝົດສະຕິໄປ ເມື່ອນໍາສົ່ງໂຮງໝໍກໍບໍ່ສາມາດເອົາໄດ້ທັນແລ້ວ…
ຈາກການເສຍຊີວິດຂອງ ສາວແອັບເປິ່ນ ໃນຄັ້ງນີ້ ຖືວ່າເປັນການສູນເສຍບຸກຄົນທີ່ມີຄວາມສາມາດຫຼາກຫຼາຍອີກຄົນໜຶ່ງ ແລະ ເປັນການສູນເສຍບຸກຄົນສໍາຄັນຂອງວົງການບັນເທີງລາວເຮົານໍາ ພ້ອມທັງຍັງເປັນອຸທາຫອນໃຫ້ກັບຫຼາຍໆຄົນໄດ້ອີກວ່າ “ຊີວິດຄົນເຮົາບໍ່ມີຫຍັງແນ່ນອນ ຊິຈາກກັນໄປມື້ໃດຍັງບໍ່ຮູ້” ເຊິ່ງຂວັນໃຈ ກໍຂໍສະແດງຄວາມເສຍໃຈກັບຄອບຄົວຜູ້ສູນເສຍ ແລະ ໄວ້ອາໄລເຖິງຜູ້ຈາກໄປ ຂໍໃຫ້ ສາວແອັບເປິ່ນ ໄປເປັນນາງຟ້າໂຕນ້ອຍໆຢູ່ເທິງຟ້າເດີ້!!!
ຂອບໃຈຮູບພາບຈາກ: Apple Khounmala