Kuanjai Magazine
ປັດຈຸບັນ ນັກລົງທຶນຈາກປະເທດຍີ່ປຸ່ນພວມໃຫ້ຄວາມສົນໃຈ ຢາກມາລົງທຶນຢູ່ ສປປ ລາວ ໃນຫຼາຍຂະແໜງການ ເປັນຕົ້ນຂະແໜງການບໍລິການ, ອຸດສາຫະກໍາ, ກະສິກໍາ, ການຄ້າ-ການລົງທຶນ ແລະ ອື່ນໆ.
ວັນທີ 22 ກຸມພາ 2017 ນີ້, ທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສາ ຫະກຳ ແລະ ການຄ້າ ໄດ້ໃຫ້ກຽດຕ້ອນຮັບ ຄະນະນັກລົງທຶນຈາກປະເທດຍີ່ປຸ່ນ ນຳໂດຍທ່ານ Tatsuhiro SHINDO ຮອງປະທານ ອົງການສົ່ງເສີມການຄ້າຍີ່ປຸ່ນ (JETRO) ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.
ໃນໂອກາດດັ່ງກ່າວ, ທ່ານນາງ ເຂັມມະນີ ພົນເສນາ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ຄະນະນັກລົງທຶນຍີ່ປຸ່ນ ທີ່ເດີນທາງມາຢ້ຽມຢາມ ສປປ ລາວ ໃນຄັ້ງນີ້ ເຊິ່ງເປັນໂອກາດອັນດີ ໃຫ້ກັບບັນດານັກທຸລະກິດທາງຝ່າຍລາວ ຂະແໜງການບໍລິການ ທີ່ຈະໄດ້ມີໂອກາດຖອດຖອນບົດຮຽນ ກັບບັນດານັກລົງທຶນຍີ່ປຸ່ນ ເພື່ອພັດທະນາທຸລະກິດ ຂອງຕົນເອງ ແລະ ກ້າວໄປສູ່ການເປັນຄູ່ຮ່ວມທຸລະກິດ ໃນຮູບແບບ Franchise ແລະ ທຸລະກິດຮູບແບບອື່ນໆ ໃນອະນາຄົດ ທັງເປັນການເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມືຮອບດ້ານ ລະຫວ່າງສອງປະເທດ ລາວ-ຍີ່ປຸ່ນ ໃຫ້ໄດ້ຮັບການພັດທະນາ ແລະ ແຕກດອກອອກຜົນຍິ່ງໆຂຶ້ນ ໃນອະນາຄົດ ແລະ ຍາວນານ.
ທ່ານ Tatsuhiro SHINDO ກໍໄດ້ສະແດງຄວາມຂອບໃຈ ຕໍ່ທ່ານນາງ ເຂັມມະນີ ພົນເສນາ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ໃນຄັ້ງນີ້, ພ້ອມທັງແຈ້ງຈຸດປະສົງ ຂອງການເດີນທາງມາຢ້ຽມຢາມ ຂອງຄະນະນັກທຸລະກິດຍີ່ປຸ່ນ ໃນຄັ້ງນີ້ ໃຫ້ທ່ານລັດຖະມົນຕີຊາບ ເຊິ່ງນັກລົງທຶນຍີ່ປຸ່ນ ສ່ວນໃຫຍ່ແມ່ນ ໃຫ້ຄວາມສົນໃຈຢາກມາລົງທຶນ ໃນຂະແໜງການບໍລິການໃນ ສປປ ລາວ. ປັດຈຸບັນ ນັກລົງທຶນຍີ່ປຸ່ນ ທີ່ເຂົ້າມາລົງທຶນຢູ່ ສປປ ລາວ ມີຫຼາຍກວ່າ 100 ບໍລິສັດ.
ຂໍ້ມູນຈາກ: ຂ່າວສານປະເທດລາວ. ທະນູທອງ
