Kuanjai Magazine
ໃນວັນທີ 24 ກຸມພາ 2017 ທີ່ຫໍປະຊຸມແຫ່ງຊາດ ໄດ້ມີພິທີຖະແຫຼງຂ່າວ ກ່ຽວກັບການປະມູນຂາຍລົດປະຈຳຕຳແໜ່ງ ຂອງການນຳລະດັບສູງ ຈຳນວນ 14 ຄັນ, ໃນນັ້ນມີລົດຍີ່ຫໍ້ BMW ລຸ້ນ 730 LI ຈຳນວນ 7 ຄັນ ແລະ ຍີ່ຫໍ້ BENZ ລຸ້ນ S 350 ຈຳນວນ 7 ຄັນ. ເພື່ອໃຫ້ບັນດານັກທຸລະກິດ, ຜູ້ປະກອບການ, ບຸກຄົນ, ນິຕິບຸກຄົນ ທຸກພາກສ່ວນທັງພາຍໃນ ແລະ ຕ່າງປະເທດຮັບຊາບທົ່ວເຖິງກັນ ພ້ອມເຂົ້າຮ່ວມການປະມູນດັ່ງກ່າວ. ເຊິ່ງການປະມູນແມ່ນຈະຈັດຂຶ້ນ ໃນວັນທີ 28 ກຸມພາ 2017 ເວລາ 15:00 ໂມງ ເປັນຕົ້ນໄປ ທີ່ຫໍປະຊຸມແຫ່ງຊາດ (ຫຼັກ6).
ທ່ານ ອາດສະພັງທອງ ສີພັນດອນ ຮອງລັດຖະມົນກະຊວງການເງິນ ທັງເປັນຫົວໜ້າຄະນະຮັບຜິດຊອບການຖອນ, ການປະມູນຂາຍ ແລະ ການປະກອບລົດປະຈຳຕຳແໜ່ງ ຂອງການນຳລະດັບສູງ ໄດ້ໃຫ້ຮູ້ເຖິງເງື່ອນໄຂ ຂອງຜູ້ເຂົ້າຮ່ວມປະມູນມີ ຄື: ຜູ້ທີ່ເຂົ້າຮ່ວມປະມູນ ແມ່ນຕ້ອງມາລົງທະບຽນດ້ວຍຕົນເອງ ເຊິ່ງຕ້ອງມີບັດປະຈຳຕົວ ຫຼື ໜັງສືຜ່ານແດນ ຖ້າບໍ່ສາມາດເຂົ້າຮ່ວມດ້ວຍຕົນເອງ ແມ່ນສາມາດມອບສິດໃຫ້ຜູ້ອື່ນມາແທນໄດ້ ແຕ່ຕ້ອງມີໃບມອບສິດຜ່ານການຈັດຕັ້ງທີ່ກ່ຽວຂ້ອງ ຫຼື ຢັ້ງຢືນຈາກບ້ານທີ່ຕົນສັງກັດຢູ່; ຜູ້ປະມູນຕ້ອງມີຄວາມຮັບຜິດຊອບທາງດ້ານກົດໝາຍ ຕໍ່ກັບລາຄາທີ່ຕົນໄດ້ສະເໜີປະມູນແຕ່ລະຄັ້ງ; ຜູ້ທີ່ຊະນະການປະມູນຕ້ອງມີຄວາມສາມາດຊຳລະເງິນ ຄ່າຊື້ລົດທີ່ຕົນປະມູນໄດ້ ໂດຍຊຳລະເປັນເງິນສົດ, ໃນກໍລະນີທີ່ຜູ້ຊະນະການປະມູນ ຫາກບໍ່ມີຄວາມຮັບຜິດຊອບຕໍ່ລາຄາ ທີ່ຕົນໄດ້ສະເໜີໄປນັ້ນ ແມ່ນຈະຖືກປັບໃໝ 10% ຂອງມູນຄ່າທີ່ສະເໜີມາ ໃນການປະມູນ ພ້ອມທັງຖືກດຳເນີນຄະດີຕາມລະບຽບກົດໝາຍ. ເຊິ່ງຮູບແບບການປະມູນແມ່ນຈະຈັດການປະມູນກັບທີ່ ເພື່ອເຮັດໃຫ້ການປະມູນມີຄວາມຍຸຕິທຳ, ໂປ່ງໃສ, ກ້ວາງຂວາງ ແທດເໝາະກັບຄວາມເປັນຈິງ.
ເຊິ່ງມີວິທີການດຳເນີນການປະມູນ ຄື: ຜູ້ທີ່ລົງທະບຽນເຂົ້າຮ່ວມປະມູນ ຈະໄດ້ຮັບປ້າຍເລກປະຈຳຕົວ ເພື່ອໃຊ້ສຳລັບຍົກຂຶ້ນ ໃນເວລາທີ່ຕ້ອງການສະເໜີ ຍົກລາຄາເພື່ອແຂ່ງຂັນ ກັບຜູ້ປະມູນທ່ານອື່ນໆ; ການປະມູນຈະເລີ່ມຕົ້ນຈາກລາຄາ ທີ່ຄະນະກຳມະການໄດ້ກຳນົດໄວ້; ການປະມູນລົດແຕ່ລະຄັນ ຈະດຳເນີນໄປຈົນກ່ວາຈະໄດ້ຜູ້ທີ່ສະເໜີ ໃຫ້ລາຄາທີ່ສູງສຸດ ເປັນຜູ້ສຸດທ້າຍ, ເຊິ່ງຜູ້ດຳເນີນການປະມູນຈະແຈ້ງລາຄາປະມູນ ທີ່ໄດ້ມີການສະເໜີຍົກຂຶ້ນ ຂອງຜູ້ເຂົ້າຮ່ວມແຕ່ລະທ່ານ 3 ຄັ້ງ ເພື່ອໃຫ້ຜູ້ເຂົ້າຮ່ວມປະມູນທ່ານອື່ນໆ ໄດ້ມີໂອກາດພິຈາລະນາສະ ເໜີລາຄາທີ່ສູງກ່ວາ, ຖ້າຄົບ 3 ຄັ້ງແລ້ວ ຫາກບໍ່ມີຜູ້ເຂົ້າຮ່ວມປະມູນທ່ານອື່ນ ສະເໜີລາຄາສູງກ່ວາຂອງຜູ້ທີ່ສະເໜີລາຄາສູງສຸດ, ຜູ້ເຂົ້າຮ່ວມປະມູນທີ່ສະເໜີລາຄາສູງສຸດກໍຈະຖືເປັນຜູ້ຊະນະການປະມູນ.
ຂໍ້ມູນຈາກ: ຂ່າວສານປະເທດລາວ. ຂ່າວ: ສົມຫວັງ, ພາບ: ໄອ່ຄຳ
