ເພື່ອແນ່ໃສ່ ເຮັດໃຫ້ ສປປ ລາວ ມີຄວາມໄດ້ປຽບ ໃນການແຂ່ງຂັນການຄ້າ ດ້ວຍການຫຼຸດ ຜ່ອນເວລາ ແລະ ຄ່າໃຊ້ຈ່າຍ ໃນການດຳເນີນການຄ້າລົງ ແລະ ໃຫ້ມີປະສິດທິຜົນຫຼາຍຂື້ນ ໂດຍຜ່ານການກວດກາໃນຈຸດດຽວ, ການບໍລິການປະຕູດຽວ ແຫ່ງຊາດ, ການນໍາໃຊ້ລະບອບຜູ້ປະກອບການ ລະດັບມາດຕະຖານ AEO ແລະ ເຮັດໃຫ້ຂັ້ນຕອນການແຈ້ງພາສີຂ້າມແດນ ກັບບັນດາປະເທດໃກ້ຄຽງ ມີການເຊື່ອມໂຍງກັນ.
ໃນກອງປະຊຸມ ທົບທວນແຜນຍຸດທະສາດ ອໍານວຍຄວາມສະດວກ ທາງດ້ານການຄ້າລາວ ໄລຍະປີ 2017-2020 ແມ່ນຕ້ອງສຸມໃສ່ການຈັດຕັ້ງປະຕິບັດສັນຍາ ອໍານວຍຄວາມສະດວກທາງດ້ານການຄ້າ ຂອງອົງການການຄ້າໂລກ ພາຍໃນປີ 2020 ເນື່ອງຈາກສັນຍານີ້ ຈະເປັນທ່າແຮງ ທີ່ຈະຊ່ວຍເຮັດໃຫ້ ຫຼຸດຜ່ອນຕົ້ນທຶນທາງດ້ານ ການຄ້າໄດ້ເຖິງ 19%. ພ້ອມດຽວກັນນີ້, ຍັງໃຫ້ຮູ້ ກ່ຽວກັບຮ່າງແຜນດຳເນີນງານ ຍຸດທະສາດອຳນວຍຄວາມສະດວກ ທາງດ້ານການຄ້າ ໄລຍະ 2017-2020 ໄດ້ກໍານົດ 6 ມາດຕະການ ຍຸດທະສາດ ຄື:
1) ການພັດທະນາກົນໄກທາງດ້ານ ສະຖາບັນການຈັດຕັ້ງ ເພື່ອການປະສານງານລະຫວ່າງ ກົມກອງທີ່ກ່ຽວຂ້ອງຢ່າງມີປະສິດທິຜົນ.
2) ສ້າງຄວາມເຂັ້ມເເຂງ ໃຫ້ແກ່ໂຄງສ້າງການບໍລິຫານລັດ ໃນຂັ້ນທ້ອງຖິ່ນເພື່ອປັບປຸງ ການສື່ສານ, ການຕິດຕາມກວດກາ ແລະ ຈັດຕັ້ງປະຕິບັດມາດຕະການ ອໍານວຍຄວາມສະດວກ ທາງດ້ານການຄ້າ.
3) ການຮ່ວມມືລະຫວ່າງປະເທດ ແລະ ການເຊື່ອມໂຍງພາກພື້ນ.
4) ການປະສານງານຮ່ວມມືກັບພາກເອກະຊົນ.
5) ບັນດາມາດຕະການບູລິມະສິດ ເພື່ອສ້າງຄວາມສະດວກງ່າຍດາຍ ໃຫ້ແກ່ຂັ້ນຕອນ, ເຊັ່ນ: ລະບົບແຈ້ງພາສີປະຕູດຽວແຫ່ງຊາດ, ການກວດສອບ ແລະ ການຈ່າຍເງິນທີ່ຈຸດດຽວ.
6) ການຈັດຕັ້ງປະຕິບັດ ສັນຍາອໍານວຍຄວາມສະດວກ ທາງດ້ານການຄ້າຢ່າງເຕັມສ່ວນ ໂດຍເລັ່ງລັດໃສ່ຂອບເຂດກໍານົດເວລາ.
ຂໍ້ມູນ: ຂ່າວສານປະເທດລາວ.