Kuanjai Magazine
ກໍາລັງເປັນຂ່າວດັງ!!! ນາຍົກລັດຖະມົນຕີ (ຍິງ) ຄົນໃໝ່ຂອງ ຟີນແລນ ເປັນນາຍົກທີ່ອາຍຸນ້ອຍທີ່ສຸດໃນໂລກ ດ້ວຍອາຍຸພຽງ 34 ປີ… ສະແດງໃຫ້ເຫັນເຖິງ “ຄວາມເທົ່າທຽມຢ່າງແທ້ຈິງ”
ເມື່ອຄວາມເທົ່າທຽມລະຫວາງຍິງ-ຊາຍ ຖືກນໍາອອກມາໃຊ້ຢ່າງແທ້ຈິງ ແມ່ຍິງກໍສາມາດສະແດງຄວາມສາມາດຂອງຕົນເອງໄດ້ຢ່າງເຕັມທີ່ ໃຫ້ສັງຄົມ ແລະ ໂລກໄດ້ເຫັນເຖິງສັກກະນາພາບ ແລະ ຄວາມສາມາດທີ່ບໍ່ໄດ້ດ້ອຍໄປກວ່າຜູ້ຊາຍໃນທຸກເລື່ອງ ຄືດັ່ງຍິງສາວ ຊາວຟີນແລນຄົນນີ້ ທີ່ໄດ້ຂຶ້ນຊື່ວ່າເປັນ ນາຍົກລັດຖະມົນຕີທີ່ອາຍຸນ້ອຍທີ່ສຸດໃນໂລກ…
ເຊິ່ງຍິງສາວຄົນນັ້ນ ທ່ານມີຊື່ວ່າ ທ່ານ ນາງ ຊານນາ ມາຣິນ ອາຍຸ 34 ປີ ຈາກພັກສັງຄົມປະຊາທິປະໄຕ ໄດ້ຮັບການສະເໜີຊື່ເມື່ອວັນອາທິດທີ 8 ທີ່ຜ່ານມາ ໃຫ້ເປັນນາຍົກລັດຖະມົນຕີຄົນໃໝ່ຂອງ ປະເທດ ຟີນແລນ ເຊິ່ງທ່ານໄດ້ເປັນນາຍົກທີ່ອາຍຸນ້ອຍທີ່ສຸດໃນໂລກ. ໂດຍທ່ານໄດ້ກ່າວວ່າ “ຂ້ອຍບໍ່ເຄີຍຄິດເຖິງເລື່ອງອາຍຸ ຫຼືເພດ, ຂ້ອຍຄິດເຖິງແຕ່ເຫດຜົນທີ່ເຂົ້າມາສູ່ວົງການ ການເມືອງ ແລະ ສິ່ງຕ່າງໆທີ່ໄດ້ຮັບຄວາມເຊື່ອຖືຈາກຜູ້ມີສິດເລຶອກຕັ້ງ. ພວກເຮົາຕ້ອງເຮັດວຽກຢ່າງໜັກໃນການສ້າງຄວາມເຊື່ອໝັ້ນຂອງລັດຖະບານໃຫ້ກັບຄືນມາ”
ແລະ ໃນຂະນະດຽວກັນ ທ່ານ ນາງ ແຄທຣີ ຄຸສມຸນີ ອາຍຸ 32 ປີ ຫົວໜ້າພັກສາຍກາງກໍຈະເຂົ້າມາຮັບຕໍາແໜ່ງເປັນລັດຖະມົນຕີການເງິນໃໝ່ ໃນຄະນະລັດຖະມົນຕີຊຸດໃໝ່ ຂອງຟີນແລນພາຍໃຕ້ການນໍາຂອງທ່ານ ນາງ ມາຣິນ ທີ່ຈະປະກາດລາຍຊື່ຄະນະລັດຖະມົນຕີໃນອາທິດນີ້…
ໂດຍເລື່ອງລາວທັງໝົດເກີດຂຶ້ນຍ້ອນວ່າ ຄະນະລັດຖະມົນຕີຊຸດທີ່ຜ່ານມາຂອງຟິນແລນ ໄດ້ປະກາດລາອອກໄປເມື່ອອາທິດຜ່ານມາ ເນື່ອງຈາກພັກສາຍກາງໄດ້ຖອນຕົວທັງໝົດ ຍ້ອນຫມົດຄວາມໄວ້ວາງໃຈໃນຕົວນາຍົກລັດຖະມົນຕີອັນຕີ ຣິນເນ ຈາກພັກສັງຄົມປະຊາທິປະໄຕ ໂດຍບໍ່ສາມາດຮັບມືກັບການຢຸດງານປະທ້ວງຂອງຫນ່ວຍງານການໄປສະນີໄດ້. ຄະນະລັດຖະບານປະສົມຊຸດກ່ອນຊື່ງນຳໂດຍ 5 ພັກການເມືອງ ຊື່ງໃນຈຳນວນນີ້ 4 ພັກມີຫົວຫນ້າເປັນຜູ້ຍິງ ຈື່ງຕັດສິນໃຈທີ່ຈະຮ່ວມກັນເປັນຄະນະລັດຖະບານປະສົມຕໍ່ໄປ ເດີນຫນ້າບໍລິຫານປະເທດດ້ວຍນະໂຍບາຍເກົ່າ ແຕ່ຕ້ອງປັບຄະນະລັດຖະມົນຕີໃຫ່ມຊື່ງກໍ່ໄດ້ທ່ານນາງ ມາຣິນ ອະດິດລັດຖະມົນຕີຄົມມະນາຄົມ ມາເຮັດຫນ້າທີ່ເປັນຫົວຫນ້າຄະນະລັດຖະບານຄົນໃຫ່ມ.
ສ່ວນທ່ານ ຣິນເນ ກໍຍັງດຳລົງຕຳແຫນ່ງຫົວຫນ້າພັກສັງຄົມປະຊາທິປະໄຕຕໍ່ໄປ ຈົນກວ່າຈະມີການເລືອກຕັ້ງຫົວຫນ້າພັກຄົນໃຫ່ມໃນເດືອນມິຖຸນາປີຫນ້າ ສ່ວນແກນນຳຄົນອື່ນໆ ໃນຄະນະລັດຖະບານປະສົມຊຸດໃຫ່ມນັ້ນ ກໍຍັງຈະມີທ່ານ ນາງ ມາເຣຍ ໂອຮິຊາໂລ ຫົວຫນ້າພັກກຣີນ ອາຍຸ 34 ປີ ເປັນລັດຖະມົນຕີປ້ອງກັນຄວາມສະຫງົບ ຕຳແຫນ່ງເດີມເຊັ່ນດຽວກັບທ່ານ ນາງ ລີແອນ ເດີຣສັນ ອາຍຸ 32 ປີ ຈາກພັກພັນທະມິດຝ່າຍຊ້າຍເປັນລັດຖະມົນຕີສຶກສາທິການ ແລະ ທ່ານ ນາງ ແອນນາ-ມາຈາ ເຮນຣິຄສັນ ຈາກພັກປະຊາຊົນສະວີດິຊ ອາຍຸ 55 ປີ ເປັນລັດຖະມົນຕີຍຸດຕິທຳ.
