Kuanjai Magazine
ຍັງເປັນທີ່ 1 ໃນໃຈຄົນລາວສະເໝີ!!! ເມ ວິຈິດຕາ MISS UNIVERSE LAOS 2019 ພູມໃຈທີ່ໄດ້ນໍາສະເໜີຄວາມເປັນລາວ ສູ່ເວທີໂລກ…
ຈົບລົງໄປເປັນທີ່ຮຽບຮ້ອຍແລ້ວ ສໍາລັບການປະກວດ MISS UNIVERSE ນາງງາມຈັກກະວານໂລກ ທີ່ມີນາງງາມຕົວແທນເກືອບ 100 ປະເທດເຂົ້າຮ່ວມປະກວດໃນຮອບຕັດສິນ ວັນທີ 9 ທັນວາ 2019 ທີ່ປະເທດ ສະຫະລັດອາເມຣິກາ ເຊິ່ງຜົນການຕັດສິນກໍໄດ້ອອກມາຢ່າງເປັນເອກະສັນແລ້ວວ່າ ສາວງາມຜູ້ຄວ້າມຸງກຸດອັນຊົງກຽດຈາກເວທີໂລກ MISS UNIVERSE ປະຈໍາປີ 2019 ນີ້ແມ່ນໄດ້ແກ່ Miss Zozibini Tunzi ຕົວແທນຈາກ ອາຟຣິກກາໃຕ້ ເຊິ່ງຫຼັງຈາກທີ່ໄດ້ຮັບຕໍາແໜ່ງ ທຸກຄົນທຸກປະເທດທົ່ວໂລກ ກໍສະແດງຄວາມຍິນດີ ແລະ ເວົ້າເປັນສຽງດຽວກັນວ່າ “ເໝາະສົມທີ່ສຸດແລ້ວ” ລວມທັງແອັດມິ້ນເອງກໍໄດ້ຮ່ວມສະແດງຄວາມຍິນດີນໍາກັບນາງຫຼາຍໆເດີ້!!!
ສ່ວນທາງດ້ານ ສາວເມ ວິຈິດຕາ ພອນວິໄລ ນາງງາມຕົວແທນປະເທດລາວເຮົາທີ່ໄດ້ເດີນທາງໄປປະກວດໃນເວທີລະດັບໂລກນີ້ ເຊິ່ງຄົນລາວເຮົາທັງປະເທດກໍໄດ້ສົ່ງກໍາລັງໃຈໄປເຊຍແບບສຸດໃຈ ແລະ ສາວເມ ເອງກໍໄດ້ປະຕິບັດໜ້າທີ່ຂອງຕົນເອງໄດ້ດີທີ່ສຸດໃນການນໍາສະເໜີຄວາມເປັນລາວ ສູ່ເວທີສາກົນໃນຄັ້ງນີ້ ແລະ ເຖິງວ່າຜົນການປະກວດ ສາວເມ ຈະບໍ່ສາມາດຍາດລາງວັນໃດໆມາຕ້ອນຄົນລາວ ແຕ່ຄົນລາວທັງປະເທດກໍບໍ່ໄດ້ເສຍໃຈ ຫຼືຜິດຫວັງໃນໂຕສາວເມແຕ່ຢ່າງໃດ! ພຽງແຕ່ນາງມີຄວາມສາມາດນໍາເອົາຊື່ ປະເທດລາວ ແລະ ວັດທະນະທໍາຂອງລາວໄປເຜີຍແຜ່ໃຫ້ຊາວໂລກໄດ້ຮູ້ຈັກ ເທົ່ານີ້ກໍຖືວ່າປະສົບຄວາມສໍາເລັດອີກກ້າວທີ່ຍິ່ງໃຫຍ່ແລ້ວ… ຂວັນໃຈ ແລະ ຄົນລາວທັງປະເທດເປັນກໍາລັງໃຈໃຫ້ສະເໝີ ຕັ້ງແຕ່ໄດ້ຕໍາແໜ່ງ MISS UNIVERSE LAOS 2019 ຈົນຮອດມື້ສຸດທ້າຍຂອງການປະກວດ MISS UNIVERSE 2019 ກໍຍັງຮັກໃນຄວາມເປັນ ເມ ແລະ ຍົກໃຫ້ ເມ ເປັນທີ 1 ໃນໃຈສະເໝີ!!!
ແລະ ຫຼັງຈາກການປະກວດສິ້ນສຸດລົງ ສາວເມ ຍັງໄດ້ໂພສຂອບໃຈແຟນໆຜ່ານ Facekbook ສ່ວນຕົວອີກວ່າ “ເປັນປະສົບການທີ່ດີທີ່ສຸດ ຄັ້ງຫນຶ່ງເທິງເວທີໂລກ MISS UNIVERSE ອາດຈະບໍ່ເຖິງຈຸດທີ່ຕັ້ງໃຈໄວ້ ເພາະມັນເປັນການແຂ່ງຂັນ ຊຸດນົກສັນຕິພາບ ອອກແບບໂດຍ BILLY ອາດຈະບໍ່ໄດ້ຂຶ້ນເວທີ ແຕ່ມັນເປັນຊຸດທີເມໃສ່ແລ້ວງາມທີ່ສຸດ. ມາຮອດນີ້ ທຸກຢ່າງ ການຮຽນຮູ້, ຮຽນຮູ້ທີ່ຈະອົດທົນ, ອົດກັ້ນ, ບາດບັ່ນ ແລະ ພະຍາຍາມ. ຂອບໃຈ ທຸກຄົນ ທີ່ເຮັດໃຫ້ຮູ້ວ່າ ເຮົາພ້ອມທີ່ຈະຊ່ວຍກັນ ສົ່ງເສີມກັນ ບໍ່ວ່າເຮົາຈະຢູ່ໃສກໍ່ຕາມໃນໂລກ ຂອບໃຈສຳລັບທຸກໆການຊ່ວຍເຫລືອ ຊັບພອດ ທັງການກະກຽມ ການຝຶກສອນ ການໃຫ້ຄວາມຮູ້ ແລະການສະຫນັບຫນູນທາງວັດຖຸ ແລະ ຈິດໃຈ ແລະ ທຸກໆຄົນ ທຸກສື່ມວນຊົນ ທຸກຂະແຫນງການ ທີ່ສົ່ງແຮງເຊຍສະເຫມີມາ ທີເຮັດໃຫ້ ເມແລະທີມງານມາຢືນຢູ່ຈຸດນີ້ໄດ້. ພາລະກິດຂອງເມ ຍັງບໍ່ໄດ້ຈົບທີ່ການແຂ່ງຂັນເວທີນີ້ ແຕ່ພາລະກິດຂອງເມຍັງຈະດຳເນີນຕໍ່ໄປ ທີ່ປະເທດລາວ ການແຂ່ງຂັນເຖິງຈະຈົບລົງພຽງເທົ່າ ແຕ່ການປັບປຸງ-ພັດທະນາ ແລະຊີວິດ ຂອງເຮົາກໍ່ຍັງຈະກ້າວຕໍ່ໄປ. ແລ້ວພົບກັນ ທີ່ປະເທດລາວ ??❤️” ແນວໃດກໍຂໍເປັນກໍາລັງໃຈ ແລະ ກຽມຕ້ອນຮັບການກັບມາຂອງ ສາວເມ ອີກສຽງໜຶ່ງເດີ້!!! #ຮັກເມ?? #ຮັກລາວ??
ຂອບໃຈຮູບພາບຈາກ: May Vichitta Phonevilay – Miss Universe Laos 2019
